Satara Municipal Council- पदवीधर व शिक्षक मतदारसंघाच्या निवडणुकीची आचारसंहिता लागू झाल्याने सातारा पालिकेतील प्रशासकीय आणि विकासकामांना सध्या ब्रेक लागला आहे. नियमित कामकाज सुरु असले तरी नवीन कामांना मंजुरी, विकासकामांशी संबंधित निर्णय आणि निधी वितरणाची प्रक्रिया संथ झाल्याने पालिकेत कामांचा दुष्काळ जाणवत आहे.

त्यातच अधिकारी- कर्मचाऱ्यांची उपस्थितीही तुलनेने कमी असल्याने पालिका कार्यालयात शुकशुकाटाचे वातावरण दिसून येत आहे. आचारसंहितेचा परिणाम पालिकेच्या सभांवरही झाला आहे. स्थायी समितीची बैठक तसेच सर्वसाधारण सभा पुढे ढकलण्यात आल्या आहेत. त्यामुळे विविध विकासकामे, प्रस्ताव आणि प्रशासकीय निर्णयांवर चर्चा होऊ शकलेली नाही.

त्यामुळे काही महत्त्वपूर्ण निर्णय आता आचारसंहिता संपल्यानंतरच मार्गी लागण्याची शक्यता आहे. दरम्यान, नगराध्यक्ष अमोल मोहिते काही महत्त्वपूर्ण कामांच्या पाठपुराव्यासाठी मुंबईत तळ ठोकून होते. संबंधित कामांबाबतची तांत्रिक प्रक्रिया पूर्ण झाली असली तरी प्रत्यक्ष निधी वितरणासाठी आचारसंहिता संपण्याची प्रतीक्षा करावी लागणार आहे. त्यामुळे कागदोपत्री प्रक्रिया पूर्ण असूनही प्रत्यक्ष कामांना गती मिळत नसल्याचे चित्र आहे.

पदवीधर व शिक्षक मतदारसंघाच्या निवडणुकीची आचारसंहिता दि. ३१ ऑक्टोबरपर्यंत लागू राहणार असल्याने त्यानंतरच पालिकेतील रखडलेल्या कामांना पुन्हा वेग येण्याची अपेक्षा आहे. निधी उपलब्ध असला किंवा तांत्रिक बाबी पूर्ण झाल्या असल्या तरी आचारसंहितेमुळे नवीन निर्णय आणि प्रत्यक्ष निधी वितरणावर मर्यादा आल्या आहेत.

आचारसंहितेच्या काळात अत्यावश्यक व नियमित कामकाज सुरू असले तरी मोठ्या विकासकामांबाबत निर्णय घेण्यास प्रशासनाला मर्यादा येत आहेत. त्यामुळे शहरातील विविध प्रलंबित कामांकडे नागरिकांचे लक्ष लागले असून, ३१ ऑक्टोबरनंतर पालिकेच्या कामकाजाला कितपत वेग येतो, याकडेही आता लक्ष लागले आहे.