Satara Health News – सातारा जिल्ह्यातील आरोग्य सेवा अधिक सक्षम, आधुनिक आणि लोकाभिमुख करण्याच्या दृष्टीने राज्य शासनाने महत्त्वाचे निर्णय घेतले आहे. सार्वजनिक बांधकाम मंत्री शिवेंद्रसिंहराजे भोसले यांच्या पुढाकाराने आरोग्य मंत्री प्रकाश आबिटकर यांच्या अध्यक्षतेखाली मुंबई येथे मंत्रालयात झालेल्या बैठकीत जिल्ह्यातील आरोग्य व्यवस्थेचा आढावा घेण्यात आला.

क्रांतिसिंह नाना पाटील जिल्हा रुग्णालय, ग्रामीण रुग्णालये, प्रलंबित आरोग्य प्रकल्प, मनुष्यबळ, अत्याधुनिक सुविधा आणि नवीन पायाभूत सुविधांबाबत अनेक निर्णय घेण्यात आले. जिल्ह्यात एमआरआय, कॅथलॅब सुविधा लवकरच उपलब्ध होणार असून, आरोग्य विभागातील रिक्त पदे भरली जाणार आहेत. जिल्ह्यातील आरोग्य विभागातील अनेक रिक्त पदांमुळे नागरिकांना येणार्‍या अडचणींची गंभीर दखल घेण्यात आली.

जिल्हा शल्यचिकित्सक, अतिरिक्त डॉक्टर, निवासी वैद्यकीय अधिकारी (आरएमओ) अशी महत्त्वाची पदे दीर्घकाळ रिक्त असल्याने आरोग्य यंत्रणेवर मोठा ताण येत आहे. वैद्यकीय अधिकार्‍यांच्या मंजूर 30 पदांपैकी केवळ दहा पदे भरण्यात आली असून, 20 पदे रिक्त असल्याची माहिती बैठकीत देण्यात आली. त्यामुळे क्रांतिसिंह नाना पाटील जिल्हा रुग्णालय,

मेढा, सोमर्डी, काशीळ येथील ग्रामीण रुग्णालये आणि जिल्ह्यातील सर्व आरोग्य संस्थांमधील रिक्त पदे प्राधान्याने भरण्याचे निर्देश देण्यात आले. ग्रामीण भागातील नागरिकांना तज्ज्ञांची सेवा उपलब्ध होण्यासाठी मेढा, सोमर्डी आणि काशीळ येथील ग्रामीण रुग्णालयांमध्ये स्त्रीरोग तज्ज्ञ, बालरोग तज्ज्ञ, भूलतज्ज्ञ, फिजिशियन आणि इतर डॉक्टरांची पदे तातडीने भरण्याचा निर्णय घेण्यात आला.

याशिवाय आवश्यकतेनुसार छत्रपती संभाजी महाराज शासकीय वैद्यकीय महाविद्यालयातील डॉक्टरांची सेवा ग्रामीण रुग्णालयांना उपलब्ध करून देण्याचा निर्णय घेण्यात आला. जिल्हा रुग्णालयातील अत्याधुनिक कॅथलॅबचे काम तातडीने पूर्ण करावे. तांत्रिक परवानग्या मिळवून, ही सुविधा लवकरात लवकर सुरू करावी. कार्डिऑलॉजिस्ट, तंत्रज्ञ आणि वैद्यकीय कर्मचार्‍यांची आवश्यक पदभरती तातडीने करण्याचे निर्देश आरोग्य मंत्री आबिटकर यांनी दिले.

जिल्हा रुग्णालयातील एमआरआय सुविधा आणि मंजूर असलेल्या 50 खाटांच्या आयुष रुग्णालयाचे बांधकाम तातडीने सुरू करण्याचे निर्देशही या बैठकीत देण्यात आले. याशिवाय मंत्री शिवेंद्रसिंहराजे भोसले यांच्या पाठपुराव्यामुळे मंजूर झालेल्या 100 खाटांच्या स्वतंत्र स्त्री रुग्णालयाच्या कामाचाही आढावा घेऊन,

उर्वरित कामांसाठी 9.50 कोटी रुपयांची मंजुरी देण्यात आली आहे. उर्वरित बांधकाम, फर्निचर, विद्युत व्यवस्था, अत्याधुनिक वैद्यकीय उपकरणांची खरेदी, मनुष्यबळाची नियुक्ती आणि इतर सर्व प्रक्रिया पूर्ण करून, हे रुग्णालय लवकरात लवकर सुरू करण्याचे निर्देश देण्यात आले.