– संदीप राक्षे
Satara DCC Bank Election- सातारा जिल्हा मध्यवर्ती सहकारी बँकेच्या निवडणुकीत महायुतीची मोट बांधण्याच्या हालचालींना आता अधिकृत चर्चेची दिशा मिळाली असली, तरी जागावाटपाचा फॉर्म्युला अद्याप निश्चित झालेला नाही. साताऱ्यातील हॉटेल प्रीती एक्झिक्युटिव्हमध्ये महायुतीतील प्रमुख नेत्यांच्या काल रात्री उशिरा झालेल्या बैठकीत विविध मतदारसंघांतील दावेदारी आणि संभाव्य जागावाटपावर चर्चा झाल्याची खात्रीलायक माहिती आहे .

मात्र, बैठकीनंतर नेत्यांनी अंतिम निर्णयाबाबत सावध भूमिका घेतल्याने तिढा कायम असल्याचे स्पष्ट झाले. सार्वजनिक बांधकाममंत्री शिवेंद्रसिंहराजे भोसले, पालकमंत्री शंभूराज देसाई, मदत व पुनर्वसनमंत्री मकरंद पाटील, ज्येष्ठ नेते रामराजे नाईक-निंबाळकर, जिल्हा बँकेचे विद्यमान अध्यक्ष खासदार नितीन पाटील, प्रभाकर घार्गे, उपाध्यक्ष अनिल देसाई यांच्यासह प्रमुख नेते बैठकीला उपस्थित होते. ग्रामविकासमंत्री जयकुमार गोरे मात्र बैठकीला अनुपस्थित होते.

त्यांच्या अनुपस्थितीचे अधिकृत कारण समजलेले नाही. जिल्हा बँकेच्या २१ जागांमध्ये कोणत्या पक्षाला किती जागा द्यायच्या, यावरच महायुतीच्या चर्चेची खरी कसोटी लागणार आहे. भाजपकडून काही जागांवर अधिक दावेदारी असल्याची चर्चा असून, राष्ट्रवादी काँग्रेस आणि शिवसेनेच्या स्थानिक नेतृत्वाची त्यावर भूमिका महत्त्वाची ठरणार आहे. जिल्हा बँकेच्या राजकारणातील पारंपरिक समीकरणे, विद्यमान संचालक,

मतदारसंघनिहाय ताकद आणि इच्छुकांची संख्या लक्षात घेता जागावाटपाचा तिढा सहज सुटण्याची चिन्हे नाहीत. विशेष म्हणजे उमेदवारी अर्ज दाखल करण्याच्या प्रक्रियेत महायुतीतील अनेक इच्छुकांनी स्वतंत्रपणे अर्ज दाखल केले आहेत. त्यामुळे आता केवळ पक्षीय वाटपाचा फॉर्म्युला ठरविण्यापेक्षा कोणत्या इच्छुकाला माघार घेण्यास तयार करायचे, कोणाला अधिकृत पाठिंबा द्यायचा आणि कोणत्या मतदारसंघात मैत्रीपूर्ण लढत टाळायची, याचे आव्हान नेतृत्वापुढे आहे.

जागावाटपापेक्षा माघारीचे आव्हान मोठे!
महायुतीतील घटक पक्षांनी आपापल्या ताकदीवर उमेदवार उभे करण्याची तयारी केल्याने अनेक मतदारसंघांत एकापेक्षा अधिक दावेदार मैदानात आहेत. त्यामुळे जागावाटपाचा फॉर्म्युला ठरविणे ही पहिली पायरी ठरणार असली तरी निश्चित केलेल्या जागांवर इतर इच्छुकांची माघार घडवून आणणे हे नेतृत्वासाठी अधिक अवघड आव्हान ठरण्याची शक्यता आहे.

जयकुमार गोरे यांच्या अनुपस्थितीची चर्चा
महायुतीच्या पहिल्याच महत्त्वाच्या बैठकीला ग्रामविकासमंत्री जयकुमार गोरे अनुपस्थित राहिल्याने राजकीय वर्तुळात चर्चा रंगली. त्यांच्या अनुपस्थितीचे अधिकृत कारण स्पष्ट झालेले नाही. जिल्हा बँकेच्या निवडणुकीसंदर्भात त्यांनी यापूर्वी घेतलेल्या भूमिकेच्या पार्श्‍वभूमीवर पुढील जागावाटपाच्या बैठकीत त्यांची भूमिका महत्त्वाची ठरणार आहे.