– संदीप राक्षे
Satara DCC Bank Election- जिल्हा मध्यवर्ती सहकारी बँकेच्या निवडणुकीत वरकरणी समन्वयाची भाषा आणि पडद्यामागे अध्यक्षपदासाठी सत्तासंघर्ष असे चित्र निर्माण झाले आहे. ‘समविचारी लोकांनी एकत्र येऊन बँक चालवायची’, असा भाजपच्या नेत्यांचा सूर असला, तरी अध्यक्षपद भाजपकडेच खेचून आणण्याची रणनीती आखली जात असल्याची चर्चा राजकीय वर्तुळात आहे.

सोसायटी मतदारसंघ वगळता उर्वरित दहा जागांपैकी सहा जागांवर दावा सांगण्याची भाजपची भूमिका म्हणजेच या निवडणुकीतील संभाव्य ‘प्लॅन बी’ मानला जात आहे. ग्रामीण विकास मंत्री जयकुमार गोरे यांनी कराडमध्ये ‘जिल्हा बँकेचा अध्यक्ष भाजपचाच असेल’, असे सूचक वक्तव्य केल्याने या चर्चेला धार आली आहे. दुसरीकडे, सार्वजनिक बांधकाम मंत्री शिवेंद्रसिंहराजे भोसले यांनी घटस्थापनेच्या मुहूर्तावर जागावाटपाची चर्चा होण्याचे संकेत दिले होते.

मात्र, एमपीएससी आयोगाच्या सचिवांच्या राजीनाम्याच्या मागणीसाठी सुरू झालेल्या आंदोलनाला भेट देऊन त्यांना शिष्टाई करावी लागली. त्यामुळे जागावाटपाची निर्णायक बैठक अद्याप होऊ शकलेली नाही. अर्ज माघारीची अंतिम मुदत २१ ऑक्टोबर असून आदल्या दिवशी दि. २० ऑक्टोबरला सर्वोच्च न्यायालयातील संचालकांच्या पात्रतेबाबातची सुनावणी आहे. या दोन घडामोडी निवडणुकीची दिशा ठरवू शकतात.

बँकिंग रेग्युलेशन कायद्यातील तरतुदीनुसार दहा वर्षांचा कार्यकाळ पूर्ण केलेल्या संचालकांच्या पात्रतेसंदर्भातील प्रश्नावर सुनावणी होणार असल्याने राजकीय गणितांना त्याची किनार आहे. सध्या माघारीबाबत फारशी हालचाल नसली तरी २० आणि २१ ऑक्टोबरला खरे राजकीय नाट्य रंगण्याची शक्यता आहे. राखीव दहा जागांपैकी सहा जागा पदरात पाडून घ्यायच्या, सोसायटी मतदारसंघातही पाच- सहा जागा जिंकण्यासाठी ताकद लावायची आणि संचालक मंडळातील संख्याबळाच्या जोरावर अध्यक्षपदावर दावा ठोकायचा.

मात्र, हा डाव यशस्वी होण्यासाठी जागावाटपातील तडजोडी आणि प्रत्यक्ष निवडणुकीतील विजय, या दोन्ही आघाड्यांवर भाजपला यश मिळवावे लागेल. दुसरीकडे, महायुतीमधील राष्ट्रवादी काँग्रेस आणि शिवसेनेने उर्वरित दहा जागांपैकी पाच जागांवर दावा सांगितल्याची चर्चा आहे. खासदार तथा विद्यमान अध्यक्ष नितीन पाटील यांची बिनविरोध निवड झाल्याचे चित्र असताना सोसायटी मतदारसंघात जास्तीत जास्त जागा जिंकून अध्यक्षपद राष्ट्रवादीकडेच राखण्याचे गणितही मांडले जात आहे.

पालकमंत्री शंभूराज देसाई यांच्या शिवसेनेने तीन जागांची मागणी केल्याने जागावाटपाचा पेच आणखी वाढू शकतो. संचालक मंडळावर शिवेंद्रसिंहराजे भोसले यांची पकड असल्याचे मानले जाते. त्यामुळे भाजपला अध्यक्षपदाचा मार्ग मोकळा करायचा, तर या प्रभावाला मित्रपक्षांच्या संख्याबळाची जोड द्यावी लागेल. रामराजे नाईक- निंबाळकर, शंभूराज देसाई, शेखर गोरे आणि उदयसिंह उंडाळकर यांच्यासारख्या नेत्यांच्या अपेक्षाही या सत्तासमीकरणात महत्त्वाच्या ठरणार आहेत.