सातारा – प्राथमिक शिक्षक बॅंकेचा शतक महोत्सवी समारंभ मुख्यमंत्री एकनाथ शिंदे यांच्या प्रमुख उपस्थितीत व ज्येष्ठ नेते शरद पवार यांच्या अध्यक्षतेखाली रविवारी (दि.२२) सकाळी १० वाजता जिल्हा परिषदेच्या यशवंतराव चव्हाण बहुउद्देशीय सभागृहात होणार असल्याची मााहिती बॅंकेचे चेअरमन किरण यादव व व्हाइस चेअरमन शहाजी खाडे यांनी पत्रकार परिषदेत दिली.

किरण यादव म्हणाले, दि. २१ ऑक्टोबर १९२४ रोजी स्थापन झालेली प्राथमिक शिक्षक बँक १०० वर्षे पूर्ण करत आहे. या बँकेच्या शतक महोत्सवी समारंभास एकनाथ शिंदे व शरद पवार यांच्यासह पालकमंत्री शंभूराज देसाई, कृष्णा खोरे विकास महामंडळाचे उपाध्यक्ष महेश शिंदे, अण्णासाहेव पाटील आर्थिक मागास विकास महामंडळाचे अध्यक्ष नरेंद्र पाटील, खा. उदयनराजे भोसले, खा. धैर्यशील मोहिते-पाटील, खा. नितीन पाटील, माजी मुख्यमंत्री आ. पृथ्वीराज चव्हाण, आ. रामराजे नाईक निंबाळकर, आ. शशिकांत शिंदे, आ. बाळासाहेव पाटील, आ. शिवेंद्रसिंहराजे भोसले, आ. मकरंद पाटील, आ. जयकुमार गोरे, आ. दीपक चव्हाण, आ. अरूण लाड, आ. जयंत आसगावकर, जिल्हा नागरी सहकारी बॅंकेचे अध्यक्ष अनिल देसाई उपस्थित राहणार आहेत.

शिक्षक बॅंकेच्या शताब्दी वर्षानिमित्त बॅंकेच्यावतीने वर्षभर विविध उपक्रमांचे आयोजन करण्यात आले होते. रविवारी होणारा शतक महोत्सवी समारंभ हा संघटनाविरहित व राजकारणविरहित असणार आहे. या कार्यक्रमाच्या नियोजनासाठी सर्व संघटनांचे पदाधिकारी, आजी माजी पदाधिकाऱ्यांसमवेत बैठका घेऊन नियोजन करण्यात आले आहे. शिक्षक बॅंकेच्या हिरक व अमृत महोत्सवी कार्यक्रमास देशाचे नेते उपस्थित होते. आता ते बॅंकेच्या शतक महोत्सवी कार्यक्रमासही उपस्थित राहत आहेत. शिक्षकांची अर्थवाहिनी असणाऱ्या या बॅंकेच्या जडणघडणीत अनेकांचा सिंहाचा वाटा असून या कार्यक्रमास उपस्थित राहवे, असे आवाहन शिक्षक समितीचे राज्य नेते उदय शिंदे यांनी केले.

शिक्षक समितीचे जिल्हाध्यक्ष विश्वंभर रणनवरे म्हणाले, पगारदार नोकरांच्या बॅंकेत ही बॅंक अग्रणी असून बॅंकेने नेहमीच सभासदाभिमुख कार्यभार केला आहे. रविवारी होणाऱ्या कार्यक्रमास संघटना, गट, तट याचा विचार न करता सर्वांनी मोठ्या संख्येने सहभागी व्हावे. कार्यक्रमानिमित्त बँकेच्या १०० वर्षाच्या कार्याचा आढावा घेणाऱ्या ‘शतार्थ’ स्मरणिकेचे प्रकाशन, एटीएम कार्डचे वितरण तसेच ११ ज्येष्ठ सभासदांचा सन्मान मान्यवरांच्या हस्ते होणार आहे. त्याचबरोवर बँकेचे माजी चेअरमन यांचाही सन्मान मान्यवरांच्या हस्ते होणार आहे. सर्व सभासद, ठेवीदार हितचिंतकांनी कार्यक्रमास उपस्थित राहवे, असे आवाहन किरण यादव, शहाजी खाडे, सर्व संचालक, मुख्य कार्यकारी अधिकारी छगन खाडे यांनी केले आहे. यावेळी शिक्षक समितीचे विभागीय उपाध्यक्ष प्रदीप कदम, शंकरराव देवरे, बॅंकेचे संचालक नवनाथ जाधव, नितीन शिर्के, विशाल कणसे, उपमुख्य कार्यकारी अधिकारी राजेश कदम यांच्यासह संचालक, अधिकारी, कर्मचारी उपस्थित होते.