Sant Dnyaneshwar Maharaj Palkhi – आळंदी-पुणे रस्त्यावरील वडमुखवाडी येथील श्री संत ज्ञानेश्वर महाराज थोरल्या पादुका मंदिरात आषाढी पायी वारीनिमित्त पंढरपूरहून आळंदीकडे परतीच्या प्रवासात असलेल्या श्री संत ज्ञानेश्वर महाराजांच्या पालखी सोहळ्याचे हरिनामाच्या गजरात उत्साहात स्वागत करण्यात आले. माऊलींच्या वैभवी पादुकांसह पालखी सोहळ्याने मंदिरात प्रवेश करताच भाविकांनी ‘ज्ञानोबा-तुकाराम’च्या जयघोषाने परिसर दुमदुमून टाकला.

श्री संत ज्ञानेश्वर महाराज संस्थानच्या वतीने प्रथा-परंपरांचे पालन करीत पालखी सोहळ्याचे स्वागत करण्यात आले. पालखी सोहळ्याचे मालक ऋषिकेश आरफळकर यांच्या हस्ते माऊलींच्या पादुकांचे पूजन करण्यात आले. त्यानंतर महापूजा, आरती आणि महानैवेद्य अर्पण करण्यात आला. श्री संत ज्ञानेश्वर महाराज थोरल्या पादुका मंदिर ट्रस्टचे संस्थापक अध्यक्ष ड. विष्णू तापकीर यांच्या हस्ते श्रींची विधिवत पूजा करण्यात आली.

माऊलींच्या पादुकांना तुळशीहार, पुष्पहार व श्रीफळ अर्पण करून परंपरेनुसार पूजा करण्यात आली. आरतीच्या वेळी भाविकांनी हरिनामाचा जयघोष केला. मंदिर परिसरात फुलांच्या व रांगोळीच्या आकर्षक पायघड्या घालण्यात आल्याने संपूर्ण परिसर भक्तिमय आणि लक्षवेधी झाला होता. पालखी सोहळ्याच्या विसाव्याच्या काळात माऊलींच्या दर्शनासाठी भाविकांची मोठी गर्दी झाली होती.

या प्रसंगी पालखी सोहळा प्रमुख अ‍ॅड. राजेंद्र उमाप, श्री ज्ञानेश्वर महाराज संस्थानचे प्रमुख विश्वस्त डॉ. भावार्थ देखणे, विश्वस्त योगी निरंजननाथ, विश्वस्त चैतन्य महाराज लोढे कबीरबुवा, विश्वस्त अ‍ॅड. रोहिणी पवार, पुरुषोत्तम महाराज पाटील, राजाभाऊ चोपदार, बाळासाहेब रंधवे चोपदार आदी मान्यवर उपस्थित होते. ट्रस्टचे संस्थापक अध्यक्ष अ‍ॅड. विष्णू तापकीर यांच्या हस्ते उपस्थित मान्यवरांचा शाल,

उपरणे व श्रीफळ देऊन सत्कार करण्यात आला. यावेळी मानकरी राहुल चिताळकर, योगेश आरु, स्वकाम सेवेचे धनंजय गावडे, दामोदर तापकीर, राजेंद्र चौधरी आदी उपस्थित होते. भाविकांना ट्रस्टच्या वतीने प्रसादाचे वाटप करण्यात आले. दरम्यान, दिघी पोलिस ठाण्याचे पोलिस निरीक्षक नितीन फटांगरे यांच्या मार्गदर्शनाखाली मंदिर परिसरात चोख पोलिस बंदोबस्त ठेवण्यात आला होता. मंदिर परिसरातील आकर्षक रांगोळी रोहिणी परतगुल्ले यांनी साकारली.