Sanjay Raut : राष्ट्रवादी काँग्रेसचे प्रमुख नेते आणि महाराष्ट्राचे माजी उपमुख्यमंत्री अजित पवार यांच्या विमान अपघातातील दुर्दैवी निधनाबाबत राज्यातून आणि संसदेतून वेगवेगळ्या शंका उपस्थित होत आहेत. या पार्श्वभूमीवर शिवसेना (उद्धव बाळासाहेब ठाकरे) पक्षाचे खासदार संजय राऊत (Sanjay Raut) यांनी राज्यसभेत भाजप सरकारला घेरले. राष्ट्रपतींच्या अभिभाषणावर सुरू असलेल्या चर्चेदरम्यान संजय राऊत यांनी अजित पवार यांच्या मृत्यूबाबत गंभीर आरोप आणि शंका व्यक्त केल्या. त्यांनी या प्रकरणाची सखोल आणि स्वतंत्र न्यायिक चौकशी करण्याची मागणी केली आहे. काय म्हणाले संजय राऊत? राज्यसभेत बोलताना संजय राऊत यांनी प्रथम सरकारवर तीव्र टीका केली. ते म्हणाले, “हे सरकार पूर्णपणे भ्रष्टाचाऱ्यांनी भरलेले आहे. संपूर्ण देशभरातील भ्रष्टाचाऱ्यांना एकत्र आणून सरकार उभे करतात, सरकार पाडतात. आमदार-खासदारांना विकत घेतात. आम्ही निवडून आणू, तुम्ही रेडिमेड विकत घ्याल… पूर्वी आपण नेत्यांना तयार करायचो, आता आपण विकत घेतो. ही तुमची लोकशाही आहे.” या शब्दांत त्यांनी भाजपवर निशाणा साधला. Ajit Pawar पुढे बोलताना संजय राऊत यांनी अजित पवार यांची आठवण काढली. ते म्हणाले, “आज मला अजित पवार यांची आठवण येत आहे. महाराष्ट्रातील मोठे नेते होते. तुमचे तीन वर्षांपासून सहकारी देखील राहिले. त्यांचे दुर्दैवी निधन झाले. आजही आम्ही हे कसे घडले या धक्क्यात आहोत.” अजित पवार यांच्या अपघाती निधनाबाबत संजय राऊत यांनी खळबळजनक दावे केले. ते म्हणाले, “अजित पवार यांच्यावर ७० हजार कोटींच्या सिंचन घोटाळ्याचा आरोप तुमच्या (भाजपा) सरकारने केला, पण ते भारतीय जनता पार्टीबरोबर आले आणि पवित्र झाले. १५ जानेवारी रोजी अजित पवार यांनी एक वक्तव्य केलं होतं. त्यांनी भारतीय जनता पार्टीला एक उत्तर दिले होते. ते म्हणाले होते की, जर तुम्ही माझ्यावर सिंचन घोटाळ्याचे आरोप करत असाल, तर सिंचन घोटाळ्याचा पैसा फक्त आम्ही खाल्ला नाही. भारतीय जनता पार्टीने देखील या सिंचन घोटाळ्यात भरपूर पैसा खाल्ला आहे आणि भारतीय जनता पार्टीची फाईल माझ्याकडे आहे. हे अजित पवारांचे वक्तव्य १५ जानेवारी रोजी आले. यानंतर १० दिवसांनी अजित पवारांचा विमान अपघात मृत्यू होतो. मी आरोप करत नाही. पण हा मृत्यू रहस्यमयपूर्ण आहे.” ‘ती’ फाईल अपघातावेळी अजित पवार यांच्याबरोबर होती? संजय राऊत यांनी आणखी एक गंभीर दावा केला. ते म्हणाले, “तुमच्यावर आरोप केला… फाईल कुठे आहे? माझी माहिती आहे की, अजित पवार नेहमी ती फाईल स्वतःजवळ ठेवत. जेव्हा मुंबईहून ते बारामतीकडे निघाले तेव्हाही ती फाईल त्यांच्यासोबत होती आणि अर्ध्या तासात अजित पवार यांचा अत्यंत वेदनादायी मृत्यू झाला. त्याचा तपास झाला पाहिजे आणि ही चौकशी एक स्वतंत्र न्यायिक चौकशी असली पाहिजे.” जस्टिस लोया प्रकरणाची आठवण अजित पवार यांच्या अपघाताची चर्चा करताना संजय राऊत यांनी जस्टिस बी. एच. लोया यांच्या रहस्यमय मृत्यूची आठवण करून दिली. ते म्हणाले, “अजित पवार यांचा अपघात पाहिल्यानंतर मला जस्टिस लोया यांची आठवण आली. तसाच प्रकारची घटना तर घडली नाही ना?” या वक्तव्यामुळे राज्यसभेत आणि महाराष्ट्राच्या राजकीय वर्तुळात मोठी खळबळ उडाली आहे. संजय राऊत यांच्या या दाव्यांमुळे अजित पवार यांच्या विमान अपघाताची अधिक सखोल चौकशी होण्याची शक्यता वाढली आहे. मात्र, अद्याप या दाव्यांवरून कोणतीही अधिकृत प्रतिक्रिया आलेली नाही.
