Sanjay Raut : ठाकरे गटाचे खासदार संजय राऊत यांनी आपल्या आरोग्याबाबत धक्कादायक खुलासा केला आहे. ईडीच्या कोठडीतून बाहेर आल्यानंतर काही महिन्यांतच आपण गंभीर आजारी पडलो आणि आपल्याला कॅन्सर झाल्याचे राऊत यांनी सांगितले. या आजाराची सुरुवात आपण तुरुंगात असतानाच झाल्याचा दावा त्यांनी केला. (Sanjay Raut)

कोल्हापूर येथे आयोजित ‘दिनमान साहित्य उत्सव पर्व २’ मध्ये झालेल्या प्रकट मुलाखतीत संजय राऊत बोलत होते. ज्येष्ठ पत्रकार विजय चोरमारे आणि अमेय तिरोडकर यांनी त्यांची मुलाखत घेतली. (Sanjay Raut)

‘माझी पत्रे राहुल गांधींपर्यंत पोहोचू दिली नाहीत’

ईडी आणि सीबीआयच्या कारवाईवर टीका करताना राऊत यांनी तपास यंत्रणांवर गंभीर आरोप केले. ईडीने आपल्याला नेमके का अटक केली आणि आपली केस काय होती, हे आजही आपल्याला माहीत नसल्याचे त्यांनी म्हटले. (Sanjay Raut)

ईडीच्या कोठडीत असताना आपण उद्धव ठाकरे, प्रकाश आंबेडकर आणि राहुल गांधी यांना पत्रे लिहिली होती. मात्र ही पत्रे संबंधित नेत्यांपर्यंत पोहोचू दिली गेली नाहीत, असा दावा राऊत यांनी केला. (Sanjay Raut)

‘घरात सापडलेल्या १२ लाखांवर एकनाथ शिंदेंचे नाव लिहिले होते’

अटकेच्या वेळी घडलेला एक प्रसंग सांगताना राऊत यांनी घरात सापडलेल्या १२ लाख रुपयांचा उल्लेख केला. “आमच्यावर रेड पडली तेव्हा घरात १२ लाख रुपये सापडले होते. आम्ही त्याच्या चार दिवस आधीच अयोध्येहून आलो होतो. त्या पुडक्यावर ‘उरलेली रक्कम एकनाथ शिंदे यांना द्यायची आहे’ असे स्पष्ट लिहिले होते,” असा दावा राऊत यांनी मुलाखतीदरम्यान केला. यावेळी त्यांनी ईडीच्या कारवाईवर आक्रमक भाष्य करत, “ईडी आज आहे, उद्या नाही,” अशी भूमिकाही मांडली. (Sanjay Raut)

मोदी-शाहांवरही राऊतांची टीका

देशाच्या राजकारणात ‘फक्त मीच राहीन’ अशी पंतप्रधान नरेंद्र मोदी आणि केंद्रीय गृहमंत्री अमित शाह यांची भूमिका असल्याचा आरोप करत राऊत यांनी ती अत्यंत घातक असल्याचे म्हटले. आपण सुरुवातीपासून आणि आयुष्यभर बाळासाहेब ठाकरे यांचेच माणूस राहणार असल्याचेही त्यांनी स्पष्ट केले. (Sanjay Raut)

राहुल गांधींबाबत काय म्हणाले?

राहुल गांधी यांनी देशाच्या नेतृत्वाला नवी दिशा दिल्याचे राऊत यांनी म्हटले. तसेच राष्ट्रवादी काँग्रेसचे ज्येष्ठ नेते शरद पवार यांच्यावर आपण अजिबात नाराज नसल्याचेही त्यांनी स्पष्ट केले. “आमच्या काही पक्षीय भूमिका आहेत आणि त्या आम्ही ठामपणे मांडतो,” अशी भूमिका संजय राऊत यांनी यावेळी मांडली. दरम्यान, संजय राऊत यांनी केलेल्या कॅन्सरबाबतच्या खुलाशामुळे राजकीय आणि सामाजिक वर्तुळात चर्चेला उधाण आले आहे. (Sanjay Raut)

Sanjay Raut : राम मंदिराचे कॉर्पोरायझेशन सुरू झाले आहे; संजय राऊत यांची टीका

Sanjay Raut: “बाळा, तू चुकीच्या पक्षात आहेस, ही मुंबई आहे…”; संजय राऊतांचा कृष्णराज महाडिकांना खोचक टोला