Sanjay Raut | Wagh Nakhe – छत्रपती शिवरायांच्या काळातील ऐतिहासिक वाघनखे साताऱ्यात आली असून ती छत्रपती शिवाजी संग्रहालयात ठेवण्यात आलेली आहेत. हा क्षण राजधानी सातारा आणि तमाम महाराष्ट्रासाठी अभिमानाचा क्षण आहे. मात्र या वाघनखांवरून संभ्रम तयार करणाऱ्या विरोधकांना याचे महत्त्व कळणार नाही, शिवरायांच्या खऱ्या वाघांचे महत्त्व नकली वाघांना काय कळणार? असा उपहासात्मक टोला मुख्यमंत्री एकनाथ शिंदे यांनी विरोधकांना लगावला.

ऐतिहासिक वाघनखे लंडनच्या गिल्बर्ट संग्रहालयातून साताऱ्याच्या ऐतिहासिक छत्रपती शिवाजी संग्रहालयात दाखल झाली. या वाघनखांच्या अनावरण आणि शिवाजी संग्रहालयाच्या उद्घाटन प्रसंगी ते बोलत होते. यावेळी उपमुख्यमंत्री देवेंद्र फडणवीस, उपमुख्यमंत्री अजित पवार, सुधीर मुनगंटीवार, उदयनराजे भोसले. इ. उपस्थित होते.

दरम्यान, वाघनखांवरून ठाकरे गटाचे नेते संजय राऊत यांनी सत्ताधारी भाजपला चांगलेच खडे बोल सुनावले आहेत. यावेळी संजय राऊत माध्यमांशी बोलत होते. संजय राऊत म्हणाले की, ‘जे कोणी बोलत आहेत ते बेईमान लोक आहेत. खंडोजी खोपडे, सूर्याजी पिसाळ यांची अवलाद असणारे हे आम्हाला नकली बोलणार,” असं म्हणत संजय राऊत यांनी मुख्यमंत्री शिंदेंवर हल्लाबोल केला.

“ज्यांनी शत्रूशी हात मिळवणी केली, ज्यांनी हिंदुहृदयसम्राट बाळासाहेब ठाकरे यांच्या पाठीत खंजीर खुपसला, हे आम्हाला नकली बोलणार, मुळात ही वाघनखं ऐतिहासिक आहेत. छत्रपती शिवाजी महाराजांनी खरंच ती वाघनखं वापरली असतील तर आम्ही त्या वाघनखांना प्रणाम करतो. पण इतिहास आणि इतिहासतज्ञांबरोबरच लंडनचं म्युझियम सांगतयं की, खात्री नाही की ती वाघनखं तिच आहेत का,” असंही संजय राऊत यावेळी म्हणाले.

ते पुढे म्हणाले, “जसं भाजपा एकेकाळी मतांसाठी गंगाजलाच्या बाटल्या विकत होतं. कुठलही पाणी भरायचे आणि गंगाजल म्हणून विकायचे. त्या पद्धतीने या सरकारने छत्रपती शिवाजी महाराजांसंदर्भात महाराष्ट्रात जी श्रद्धा आहे त्या श्रद्धेचा व्यापार चालवला आहे. वाघनखं ही काय मत मागण्याची वस्तू आहे का? राजकारण करण्याची वस्तू आहे का? ती ऐतिहासिक आणि श्रद्धेची जागा आहे.

तुम्ही लोकांना फसवत आहात. ही फसवणूक तुमच्या अंगलट आल्याशिवाय राहणार नाही, छत्रपतींच्या वाघनखांविषयी आम्हाला अत्यंत आदर आणि श्रद्धा आहे, पण तुम्ही या महाराष्ट्रात निवडणुकीच्या तोंडावर वाघनखं… वाघनखं… करत आहात त्याआधी स्वतःची नखं नीट कापा मग वाघनखांवर बोला,” असा टोला देखील राऊत यांनी यावेळी लगावला.

सातारा येथे छत्रपती शिवाजी संग्रहालयाच्या दुसऱ्या मजल्यावर स्वतंत्र चार कक्षांची निर्मिती करण्यात आली आहे. त्यापैकी एका कक्षामध्ये वाघनखे ही काचेच्या पेटीत सुरक्षित ठेवण्यात आलेली आहेत. या वाघनख्यांचे अनावरण व शिवाजी संग्रहालयाचे उद्घाटन झाल्याचे मुख्यमंत्री एकनाथ शिंदे यांनी पाहणी करून जाहीर केले.