Sanjay Raut: “दादा महायुतीत आले नाहीत, त्यांना अटकेची धमकी दिली”; संजय राऊतांचा फडणवीस आणि अमित शाहांवर आरोप
Sanjay Raut: 'एफआयआर दाखल करून योग्य रितीने तपास केला असता तर देवेंद्र फडणवीस यांच्यावर संशय घेण्याचे कारण नव्हते'

Sanjay Raut: उपमुख्यमंत्री अजित पवार यांचे 28 जानेवारी 2026 रोजी अपघाती निधन झाले. त्यानंतर आमदार रोहित पवार यांनी विमान अपघातामागे घातपात असल्याचा संशय व्यक्त केला होता. त्यानंतर काल पत्रकार परिषद घेत रोहित पवार यांनी मुख्यमंत्री देवेंद्र फडणवीस यांचा मफलर घातलेला फोटो दाखवला. रोहित पवारांच्या या आरोपानंतर राजकीय वातावरण चांगलेच तापले आहे.
यावर प्रतिक्रिया ठाकरे गटाचे खासदार संजय राऊत यांनी केंद्रीय गृहमंत्री अमित शाह आणि मुख्यमंत्री देवेंद्र फडणवीस यांच्यावर निशाणा साधला.
संजय राऊत म्हणाले की, “रोहित पवार यांनी काल मफलर मॅनचं कोडं सोडवलं. ज्या विमान कंपनीचे विमान अजित पवार यांनी अपघातावेळी वापरले होते, त्यामध्ये गडबड होती, असे अनेकांचे म्हणणे आहे. मुख्यमंत्री देवेंद्र फडणवीस या विमान कंपनीच्या मालकाच्या मुलाच्या लग्नात पदर घेतल्यासारखा मफलर घेऊन हसत वावरत होते. जे काल रोहित पवारांनी दाखवलं, त्यासाठी त्यांचे कौतुक आहे.
मुख्यमंत्री देवेंद्र फडणवीस यांनी त्यावर भाष्य केले पाहिजे. एफआयआर दाखल केला आणि योग्य रितीने तपास केला असता तर देवेंद्र फडणवीस यांच्यावर संशय घेण्याचे कारण नव्हते. ज्याअर्थी एफआयआर दाखल करण्यात आला नाही, याचा अर्थ ते अजितदादांच्या रहस्यमय मृत्यूमध्ये काही जे सूत्र आणि पात्र आहेत त्यांना वाचवण्याचा प्रयत्न करत आहे, या दृष्टीने रोहित पवार यांनी मफलर मॅन दाखवले.”
अमित शाह आणि देवेंद्र फडणवीस हे अजित पवार यांच्या अपघातप्रकरणाच्या तपासाची फाईल दाबत असल्याचा दावा संजय राऊत यांनी केला. “एरवी राज्याचे गृहमंत्री फालतू गोष्टींवर एफआयआर दाखल करायला सांगतात. मग अजितदादांच्या संशयास्पद मृत्यूप्रकरणात त्यांनी एफआयआर दाखल का करुन दिला नाही,” असा सवाल ठाकरे गटाचे खासदार संजय राऊत यांनी उपस्थित केला.
‘अमित शाह यांनी ईडीचा वापर अजित पवार जिवंत असताना त्यांच्या पाठीशी लावण्यासाठी केला’
“अमित शाह यांनी ईडीचा वापर अजित पवार हे जिवंत असताना त्यांच्या पाठीशी लावण्यासाठीच केला का? सीबीआयकडून अजित पवार यांच्या मृत्यूचा तपास होऊ शकत नाही का?, असा सवाल संजय राऊत यांनी उपस्थित केला. अमित शाह यांनी अजितदादांवर सिंचन घोटाळा आणि जरंडेश्वर कारखान्यातील घोटाळ्याचे आरोप केले होते.
काल अमित शाह यांनी अजित पवार यांच्या पुतळ्याचे अनावरण करण्यापूर्वी व्यासपीठावरुन माफी मागायला पाहिजे होती. दादा महायुतीत आले नाहीत, त्यांना ओढून आणलं तुमच्याकडे कोणी मनापासून येत नाही, तुम्ही कोणाशीही नातं ठेवत नाहीत, तुम्ही स्वार्थी आहात तुमचं नातं, भ्रष्टाचाऱ्यांशी, जमीनदारांशी आहे. ईडी, सीबीआय, आयकर खात्याची आणि अटकेची टांगती तलवार अजितदादांवर ठेवण्यात आली, असा आरोपही संजय राऊत यांनी भाजपवर केली.
हेही वाचा:






