Maharashtra politics : ‘प्रसिद्धीच्या हव्यासापोटी केलेली स्टंटबाजी’; रोहित पवारांच्या आरोपांवर भाजप नेत्याचा खोचक पलटवार
Maharashtra politics : रोहित पवारांच्या आरोपांनंतर भाजप नेत्यांकडून त्यांच्यावर टीका केली जात आहे.

Maharashtra politics : राष्ट्रवादी काँग्रेसच्या शरद पवार गटाचे आमदार रोहित पवार यांनी १६ नोव्हेंबर रोजी मुंबईतील यशवंतराव चव्हाण सेंटर येथे पत्रकार परिषद घेतली. या पत्रकार परिषदेत त्यांनी ‘मफलर मॅन’बाबत महत्त्वाचा खुलासा केला. तसेच अजित पवार यांच्या विमान अपघात प्रकरणावरून त्यांनी काही गंभीर प्रश्नही उपस्थित केले.
अजित पवार यांच्या विमान अपघात प्रकरणात व्हीआरएस कंपनीचे मालक व्ही. के. सिंह यांच्या चौकशीची मागणी रोहित पवार सातत्याने करत आहेत. या प्रकरणात व्ही. के. सिंह यांना नेमके कोण पाठबळ देत आहे, असा सवाल उपस्थित करत त्यांनी थेट मुख्यमंत्री देवेंद्र फडणवीस यांचा फोटो पत्रकार परिषदेत दाखवला. यानंतर राज्याच्या राजकीय वर्तुळात मोठी खळबळ उडाली आहे.
दरम्यान, रोहित पवारांच्या आरोपांनंतर भाजप नेत्यांकडून त्यांच्यावर टीका केली जात आहे. भाजपचे प्रवक्ते केशव उपाध्ये यांनीही सोशल मीडियावर पोस्ट करत रोहित पवारांच्या आरोपांना प्रत्युत्तर दिले आहे.
फोटो दाखवून राजकीय बॉम्ब फोडण्याचा आव आणू नका; जनता असल्या आरोपांचा भीक घालणार नाही.
राष्ट्रवादी काँग्रेसमधील राजकीय अस्तित्वाची लढाई आणि स्वतःचा वेगळा सवतासुभा उभा करण्याच्या नादात रोहित पवारांनी आता राजकीय सभ्यतेच्या मर्यादाही ओलांडल्या आहेत. प्रसिद्धीसाठी कोणत्याही थराला जाण्याची ही धडपड महाराष्ट्र उघड्या डोळ्यांनी पाहत आहे!
राजकारणात अस्तित्व निर्माण करण्यासाठी कर्तृत्व लागते, केवळ फोटो दाखवून चालत नाही! प्रसिद्धीच्या हव्यासापोटी केलेली ही स्टंटबाजी रोहित पवारांचे कुवत दाखवून देते!
अजितदादांसारख्या लोकप्रिय नेत्याच्या दुर्दैवी विमान अपघाताचे गांभीर्य लक्षात घेण्याऐवजी या घटनेचा राजकीय हत्यार म्हणून वापर करण्याचा उद्योग सुरू आहे. मुख्यमंत्री देवेंद्र फडणवीस यांच्यावर चिखलफेक करण्यासाठी एका फोटोचा आधार घेणे, हा राजकीय बेजबाबदारपणाचा कळस आहे.
देवेंद्र फडणवीस आणि अजितदादा पवार यांच्यातील मैत्री, विश्वास आणि राजकीय सहकार्याचा इतिहास महाराष्ट्राला माहीत आहे. अशा मैत्रीच्या नात्यावर संशयाचे विष कालवण्याचा प्रयत्न म्हणजे स्वतःच्या राजकीय खुजेपणाचे प्रदर्शन आहे.
एखाद्या कार्यक्रमातील फोटो दाखवून कोणाला गुन्हेगार ठरवण्याचा अधिकार तुम्हाला कोणी दिला? निराधार आरोपांच्या फैरी झाडून जनतेची दिशाभूल करणे बंद करा!
प्रत्येक संवेदनशील घटनेत देवेंद्र फडणवीस यांचे नाव गोवायचे, संशयाचे वातावरण निर्माण करायचे आणि त्यातून राजकीय प्रसिद्धी मिळवायची, हा तुमचा ठरलेला अजेंडा झाला आहे.
अजितदादांच्या अपघाताचे सत्य निष्पक्ष तपासातून बाहेर आलेच पाहिजे. दोषींना कठोर शिक्षा झालीच पाहिजे. पण तपासाऐवजी राजकीय आरोपांचे नाट्य उभे करणाऱ्यांना महाराष्ट्र माफ करणार नाही.
@Dev_Fadnavis
@RaviDadaChavan#राजकीयस्टंटबाजी #फोटोपॉलिटिक्स #रोहितपवार #देवेंद्रफडणवीस #अजितदादा #महाराष्ट्रराजकारण #सत्याचाविजय
— Keshav Upadhye (@keshavupadhye) November 16, 2026
राजकारणात अस्तित्व निर्माण करण्यासाठी कर्तृत्व लागते, केवळ फोटो दाखवून चालत नाही! प्रसिद्धीच्या हव्यासापोटी केलेली ही स्टंटबाजी असल्याचा जोरदार पलटवार केशव उपाध्ये यांनी केला आहे.
अजितदादांसारख्या लोकप्रिय नेत्याच्या दुर्दैवी विमान अपघाताचे गांभीर्य लक्षात घेण्याऐवजी या घटनेचा राजकीय हत्यार म्हणून वापर करण्याचा उद्योग सुरू आहे. मुख्यमंत्री देवेंद्र फडणवीस यांच्यावर चिखलफेक करण्यासाठी एका फोटोचा आधार घेणे, हा राजकीय बेजबाबदारपणाचा कळस असल्याची टीका सोशल मीडिया पोस्टमध्ये भाजपचे प्रवक्ते केशव उपाध्ये यांनी केली आहे.
अजितदादांच्या अपघाताचे सत्य निष्पक्ष तपासातून बाहेर आलेच पाहिजे. दोषींना कठोर शिक्षा झालीच पाहिजे. पण तपासाऐवजी राजकीय आरोपांचे नाट्य उभे करणाऱ्यांना महाराष्ट्र माफ करणार नाही, असे पोस्टच्या शेवटी केशव उपाध्ये म्हणाले आहेत.





