Sangli Bank Election : सांगली जिल्हा मध्यवर्ती सहकारी बँकेच्या निवडणुकीत राजकीय समीकरणांना मोठे वळण मिळाले आहे. सर्वपक्षीय बिनविरोध निवडणुकीच्या प्रयत्नांदरम्यान भाजप आमदार गोपीचंद पडळकर यांनी जत सोसायटी गटातून निवडणूक लढवत विजय मिळवला. (Sangli Bank Election)

या विजयामुळे जिल्हा बँकेत पडळकरांची एन्ट्री झाली असून, राष्ट्रवादी काँग्रेस (शरद पवार गट) नेते जयंत पाटील यांच्या राजकीय गणिताला धक्का बसल्याची चर्चा सुरू आहे. (Sangli Bank Election)

विजयानंतर गोपीचंद पडळकर आणि सदाभाऊ खोत यांनी जयंत पाटील यांच्यावर जोरदार टीका केली. दुसरीकडे, कवठेमहांकाळ सोसायटी गटातून विजयी झालेले अजित पवार गटाचे नेते अजितराव घोरपडे यांनीही आपल्याविरोधात कट रचल्याचा आरोप केला. (Sangli Bank Election)

धनगरी वेशभूषेत पडळकरांचा जल्लोष

विजयानंतर आमदार गोपीचंद पडळकर यांनी अनोख्या पद्धतीने आनंदोत्सव साजरा केला. खांद्यावर घोंगडे, हातात काठी आणि डोळ्यांवर गॉगल अशा पारंपरिक धनगरी वेशभूषेत ते बँकेच्या दारात पोहोचले. यावेळी समर्थकांसह त्यांनी ‘बाप तो बाप रहेगा’ आणि ‘मै हूँ डॉन’ या गाण्यांवर ठेका धरला. (Sangli Bank Election)

‘टप्प्यात आणून करेक्ट कार्यक्रम केला’

विजयानंतर पडळकर यांनी जयंत पाटलांवर निशाणा साधला. “मला बाजूला ठेवून बिनविरोधची खेळी खेळली जात होती. मात्र, जतच्या जनतेने विरोधकांना टप्प्यात आणून त्यांचा करेक्ट कार्यक्रम केला आहे,” अशी टीका त्यांनी केली. (Sangli Bank Election)

सदाभाऊ खोत यांचाही जयंत पाटलांवर हल्लाबोल

आमदार सदाभाऊ खोत यांनीही पडळकरांच्या विजयावरून जयंत पाटलांना लक्ष्य केले. “प्रस्थापितांच्या चिरेबंद वाड्याला पडळकरांच्या विजयाने मोठा तडा दिला आहे. वाळव्याच्या नेत्याने जिल्हा बँकेला ‘अलीबाबाची गुहा’ बनवले होते. पण आता या गुहेतील टोळीचा बंदोबस्त करण्यासाठी आमचा वाघ आत शिरला आहे. वाळव्याच्या गब्बरसिंगाने आता सावध राहावे,” असा घणाघात खोत यांनी केला. (Sangli Bank Election)

अजितराव घोरपड्यांचा षड्यंत्राचा आरोप

कवठेमहांकाळ सोसायटी गटातून विजय मिळवल्यानंतर माजी मंत्री अजितराव घोरपडे यांनीही जयंत पाटलांवर आरोप केले. “माझ्याविरोधात मोठा कट रचला गेला होता. वरून ऑर्डर आली होती. मात्र, कट पूर्ण झाला नाही. या निवडणुकीत महायुतीचे पारडे जड झाले असून, त्याचे पडसाद आगामी काळात इतर पक्षांवर नक्कीच दिसतील,” असा इशारा त्यांनी दिला. (Sangli Bank Election)

दरम्यान, गोपीचंद पडळकर यांच्या विजयामुळे सांगली जिल्हा बँकेतील राजकीय समीकरणांना नवे वळण मिळाले आहे. या निवडणुकीतील निकालांचे आगामी स्थानिक राजकारणावर काय परिणाम होतात, याकडे आता राजकीय वर्तुळाचे लक्ष लागले आहे. (Sangli Bank Election)

सोसायटी गटातील ४ प्रमुख लढतींचे निकाल

• जत सोसायटी गट : भाजप आमदार गोपीचंद पडळकर यांनी काँग्रेसच्या विनोद पवार यांचा २० मतांनी पराभव केला. (पडळकर – ५४ मते, विनोद पवार – ३४ मते)
• तासगाव सोसायटी गट: माजी खासदार संजयकाका पाटील यांनी राष्ट्रवादीच्या (शरद पवार गट) माजी आमदार सुमनताई पाटील यांचा अवघ्या १ मताने पराभव केला. (संजयकाका – ३९ मते, सुमनताई पाटील – ३८ मते)
• कवठेमहांकाळ सोसायटी गट: राष्ट्रवादीचे (अजित पवार गट) माजी मंत्री अजितराव घोरपडे यांनी शरद पवार गटाच्या टी. व्ही. पाटील यांचा ४ मतांनी पराभव केला. (घोरपडे – ३७ मते, टी. व्ही. पाटील – ३३ मते)
• मिरज सोसायटी गट: काँग्रेसच्या अण्णासाहेब कोरे यांनी भाजपच्या अनिल शेगूनशे यांचा २६ मतांनी पराभव केला. (कोरे – ४७ मते, शेगूनशे – १९ मते) (Sangli Bank Election)

सांगली जिल्हा बँक – २१ जागांचे पक्षीय बलाबल

• काँग्रेस: ६ जागा
• भाजप: ५ जागा
• राष्ट्रवादी काँग्रेस (शरद पवार गट): ४ जागा
• शिवसेना (शिंदे गट): ३ जागा
• राष्ट्रवादी काँग्रेस (अजित पवार गट): ३ जागा

सांगली जिल्हा बँकेतील २१ नवनिर्वाचित संचालकांची यादी:

१. गोपीचंद पडळकर (BJP)
२. राहुल महाडिक (BJP)
३. रवी देशमुख कडेपूर (BJP)
४. रणसिंह देशमुख (BJP)
५. पृथ्वीराज पाटील (BJP)
६. विश्वजित कदम (Cong)
७. महेंद्र लाड (Cong)
८. सौ. सावंत ताई (Cong)
९. अल्ताफ कोरे (Cong)
१०. पूजा विशाल (Cong)
११. K. D. कांबळे (Cong)
१२. विराज नाईक (NCP-SP)
१३. चेतराज पाटील (NCP-SP)
१४. वैभव शिंदे (NCP-SP)
१५. कुचेर आबा (NCP-SP)
१६. रणधिर नाईक (NCP-AP)
१७. अजितराव घोरपडे (NCP-AP)
१८. सुहास बाबर (शिवसेना – शिंदे गट)
१९. बाळासो होनराव (शिवसेना – शिंदे गट)
२०. तानाजी पाटील (शिवसेना – शिंदे गट)
२१. संजय पाटील तांबवे (अपक्ष) (Sangli Bank Election)