Sanchita Ugale : छोट्या पडद्यावरील लोकप्रिय अभिनेत्री संचिता उगलेच्या आत्महत्या प्रकरणाला नवीन वळण मिळाले आहे. गेल्या काही दिवसांपूर्वी संचताने आपल्या राहत्या घरी गळफास घेत आपल्या आयुष्याचा शेवट केला. अवघ्या 30 वर्षांच्या संचिताने या जगाचा निरोप घेतला. तिने आत्महत्यासारखं टोकाचं पाऊल का उचललं याविषयी आता विविध चर्चा सुरू झाल्या आहेत.

महत्वाचे म्हणजे तिने आत्महत्या केली की तिच्यावर कोणता दबाव होता, याविषयी देखील अनेक तर्क वितर्क बांधले जात आहेत. अशातच या आत्महत्या प्रकरणात एक महत्वाची माहिती समोर आली आहे. संचिता गेल्या 6 महिन्यांपासून डिप्रेशनमध्ये होती अशी नवी माहिती समोर आली आहे

या प्रकरणाचा सखोल तपास पोलिस करत असून पोलिसांनी संचिताचा मोबाईल फोन जप्त केला आहे. या फोनमधील चॅट्स आणि गॅलरीची तपासणी पोलीस करत आहेत. संचिता आणि एका डॅाक्टरमध्ये संभाषण झाल्याचे चॅट्स पोलिसांना मिळाले आहेत. तसेच फोनमधून काहीही डिलीट झाल्याचा संशय आल्यास, फोन फॉरेन्सिककडे तपासणीसाठी पाठवला जाईल, असेही सांगण्यात येत आहे.

संचिता नैराश्यवर उपचार घेत होती?

पोलिसांच्या सूत्रांनुसार, संचिता गेल्या सहा महिन्यांपासून डिप्रेशनमध्ये होती आणि त्यावर ती उपचार घेत होती. पोलिसांनी संचिताच्या आणि डॉक्टरांसोबतच्या संभाषणाचे चॅट्समध्ये ही माहिती उघड झाली आहे. त्यामुळे पोलिसांकडून संचिताच्या नैराश्याचे कारणाचा शोध घेतला जात असून पुढील तपास केला जात आहे.

हेही वाचा : Omraje Nimbalkar : रात्रीस खेळ चाले…! श्रीकांत शिंदेंचा डाव अन् विशेष विमानाने पुण्याहून ओमराजे निंबाळकर दिल्लीत

नेमकं काय संभाषण झालं? 

संचिता आणि तिच्या डॉक्टरांमधील चॅट्स

डॉक्टर: वाईट भविष्य?

संचिता: मला वाटते की माझ्या मेंदूला गंभीर समस्या आहे. माझे लक्ष विचलित होते. मला ऐकू येत नाही.

डॉक्टर: तुम्ही माझ्यासोबत ऑनलाइन सेशन्स घेऊ शकाल का?

संचिता: नक्कीच.

डॉक्टर: तुम्ही कधीपासून सुरुवात करू शकता ते सांगा. तुम्हाला जेव्हा हवं तेव्हा तुम्ही माझ्याशी बोलू शकता, अगदी तुमची तब्येत बरी नसतानाही.

संचिता: माझी तब्येत कधीच बरी नसते. मी पूर्णपणे हरवून गेले आहे.

डॉक्टर: काळजी करू नका, मी तुम्हाला ठीक करेन.

संचिता: कधी? सहा महिने झाले आहेत. मी खूप विचित्र वागत आहे. लोक मला घाबरतात.

डॉक्टर: आधी आपल्याला आपले सेशन्स सुरू करावे लागतील. त्याआधी मी काहीही करू शकत नाही. आधी आपले ऑनलाइन सेशन्स होतील. मग, जेव्हा तुम्हाला सोयीस्कर वाटेल, तेव्हा आपण समोरासमोर सेशन्स घेऊ. मला तुमच्याबद्दल प्रत्येक तपशील जाणून घ्यायचा आहे. मला तुमच्या भूतकाळाबद्दल सर्व काही जाणून घ्यायचे आहे. तरच मी आत्मविश्वासाने तुमच्यावर उपचार करू शकेन.

संचिता: मी माझे सर्व पैसे खर्च केले आहेत, पण कोणताही उपचार लागू पडत नाहीये.

डॉक्टर: सकारात्मक राहा. देवावर विश्वास ठेवा.

संचिता: माझ्यात आत्मविश्वास नाही.

डॉक्टर: मग तुला माझ्याकडून काय मदत हवी आहे?

संचिता: मला माहीत नाही, पण बघूया पुढे काय होतंय.

डॉक्टर: स्वतःची काळजी घे.

संचिता: हो.

संचिता आणि डॅाक्टर यांच्यातील संभाषणाचे चॅट्स एका वृत्तवाहिनीने दिलेल्या बातमीनुसार देत आहोत.

या प्रकरणात उगले कुटुंबाचा आरोप आहे की, टेलिव्हिजनवर काम करताना संचिता खूप तणावात होती. त्यामुळे तिला नेमका कसला तणाव होता याबाबतही माहिती पोलिस घेत आहेत.

हेही वाचा : Sanjay Raut : रात्री 11 वाजता फोनवरुन मिळाली फुटीची खबर ? संजय राऊत म्हणाले…