Sanjay Jadhav : राज्याच्या राजकारणात ‘ऑपरेशन टायगर’मुळे मोठी खळबळ उडाली असून, उद्धव ठाकरे गटातील सहा खासदारांनी बंडखोरी केली आहे. आज शिवसेनेचा 60 वर्धापन दिन असल्याने मोठ्या राजकीय घडामोडी घडणार असल्याची चर्चा आहे. या पार्श्वभूमीवर दोन्ही शिवसेना पक्षाचे दोन स्वतंत्र मेळावे पार पडणार आहेत. यासाठी दोन्ही गटाकडून जोरदार तयारी करण्यात आली आहे.

या दोन्ही स्वतंत्र मेळाव्यात एकनाथ शिंदे आणि उद्धव ठाकरे काय बोलणार याकडे अवघ्या महाराष्ट्राचे लक्ष लागले आहे. अशातच फुटीर गटातील खासदार संजय जाधव यांनी सोशल मीडियावर एक पोस्ट शेअर केली आहे. या पोस्टमध्ये अनेक राजकीय अर्थ लावले जात आहेत.

खासदार संजय जाधव यांच्या सोशल मीडिया पोस्टमध्ये काय आहे? 

खासदार संजय जाधव यांच्या सोशल मीडियावरील पोस्टमध्ये उद्धव ठाकरे यांचा फोटो नसून केवळ बाळासाहेब ठाकरे यांचा फोटो आहे. तसेच पोस्टमध्ये उद्धव ठाकरे यांच्या शिवसेनेचे चिन्ह असलेली मशाल गायब आहे. ‘अखंड शिवसेना, अटळ हिंदुत्व… 60 वर्ष हिंदुत्वाशी वचनबद्धता’, असा मजकूर या पोस्टवर लिहला आहे.

हेही वाचा : Narhari Zirwal : भेसळखोरांची आता खैर नाही! तुकाराम मुंढे अॅक्शनमध्ये असताना आता मंत्री देखील मैदानात, अॅान स्पॅाट केली तपासणी

दरम्यान, ‘ऑपरेशन टायगर’ अंतर्गत ठाकरे गटातील संजय जाधव, संजय देशमुख, संजय दिना पाटील, नागेश पाटील आष्टीकर, ओमराजे निंबाळकर आणि भाऊसाहेब वाकचौरे हे सहा खासदार शिंदे गटात प्रवेश करणार असल्याची चर्चा आहे. मात्र, तांत्रिक कारणांमुळे हा पक्षप्रवेश लांबणीवर पडल्याचे सांगितले जात आहे.

या घडामोडींनंतर संभाव्य तणाव आणि कायदा-सुव्यवस्थेचा धोका लक्षात घेता संबंधित खासदारांना वाय दर्जाची सुरक्षा देण्यात आली आहे. यवतमाळ-वाशिमचे खासदार संजय देशमुख यांच्या मतदारसंघात मात्र तीव्र प्रतिक्रिया उमटताना दिसत असून त्यांच्या घराबाहेर पोलिस बंदोबस्त वाढवण्यात आला आहे.

शिवसेनेच्या 60 व्या वर्धापन दिनानिमित्त नेस्को सेंटर परिसरात दोन्ही गटांकडून मोठ्या प्रमाणावर बॅनरबाजी करण्यात आली असून, “जनात शिवसेना, मनात शिवसेना” अशी टॅगलाइन झळकत आहे. या मेळाव्यात उपमुख्यमंत्री एकनाथ शिंदे बोलणार याकडे सर्वांचे लक्ष लागले आहे.

हेही वाचा : US Iran Deal: “या करारासाठी ट्रम्प खूप डेस्परेट होते, मला ते…” ; शांतात कराराविषयी मोजताब खामेनी यांचं धक्कादायक विधान