Hasan Mushrif | Samarjit Ghatge : भाजपचे बडे नेते समरजितसिंह घाटगे यांनी नुकतंच अधिकृतरित्या शरद पवार गटात प्रवेश केला आहे. यामुळे भाजपला पश्चिम महाराष्ट्रात मोठा धक्का बसला आहे. समरजितसिंह घाटगे तुतारी हातात घेणार असल्याची चर्चा मागच्या काही दिवसांपासून राजकीय वर्तुळात रंगली होती. अखेर काल (दि. ३) त्यांनी शरद पवार गटात अधिकृतरित्या प्रवेश केला.
कागलमधील ऐतिहासिक गैबी चौकात शरद पवार यांच्या उपस्थितीत समरजित घाटगे यांचा पक्षप्रवेश सोहळा पार पडला. समरजितसिंह घाटगे हे हसन मुश्रीफ यांचे कट्टर विरोधक मानले जातात. आगामी विधानसभा पार्श्वभूमीवर समरजित सिंह घाटगे यांचा पक्षप्रवेश महत्वाचा मानला जात आहे. कागल विधानसभा मतदारसंघातून हसन मुश्रीफ यांच्याविरोधात समरजित घाटगेंची उमेदवारी दिली जाऊ शकते.
दरम्यान, यावर आता हसन मुश्रीफ यांनी जोरदार टीकास्त्र सोडल्याचं पाहायला मिळालं आहे. प्रसारमाध्यमांशी बोलताना हसन मुश्रीफ म्हणाले की, “जयंत पाटील दोन दिवसांपूर्वी आले, त्यांनी सभा घेतली. काल पवार साहेबांनी सभा घेतली, मला समजत नाही की ते माझ्यासारख्या अल्पसंख्यांक कार्यकर्त्यांच्या मागे का लागले आहेत? मी पुन्हा म्हणतो की, निवडणुकीत शरद पवार आपसे बैर नही, समरजीत अब तुम्हारी खैर नही.!’ असं ते यावेळी म्हणाले.
पुढे बोलताना मुश्रीफ म्हणाले, “शरद पवार साहेबांनी कायम प्रजेचा आणि रयतेमधून आलेल्या सामान्य कार्यकर्त्यांचा प्रचार केलेला आहे. राजा विरोधात प्रजा अशी निवडणूक आहे आणि प्रजा कायमच जिंकत असते. मंत्री होण्यासाठी आधी निवडणुकीत निवडून यावे लागतं.
मागच्या सहा निवडणुकांमध्ये मी विजय मिळवला आहे. तेव्हा माझ्यासमोर एकापेक्षा एक असे उमेदवार होते. तीन वेळा तिरंगी लढत झाली, तीन वेळा दोघांमध्ये लढत होती, तरीही मी विजय मिळवत आलो आहे.” असं देखील हसन मुश्रीफ यावेळी म्हणाले.
समरजितसिंह घाटगे कोण आहेत ?
समरजितसिंह घाटगे छत्रपती राजर्षी शाहू महाराजांच्या जनक घराण्याचे (घाटगे) वंशज आहेत. त्यांनी पुण्यातून चार्टर्ड अकाउंटंटचे शिक्षण घेतले. वडिलांच्या निधनानंतर छत्रपती शाहू कारखानाच्या निवडणुकीत समरजीत घाटगेंचा विक्रमी मतांनी विजय झाला. तेव्हापासून ते राजकारणात सक्रिय झाले. २०१५ मध्ये समरजितसिंह घाटगेंकडे पहिल्यांदाच अध्यक्षपद सोपवण्यात आलं.
म्हाडाच्या पुणे विभागाचे अध्यक्ष म्हणूनही त्यांनी काम केले. भाजपमध्ये असताना घाटगेंकडे कोल्हापूर जिल्हा अध्यक्षपदाची जबाबदारी घेतली होती. समरजितसिंग घाटगे हे अगदी परवापर्यंत भाजपाचे कोल्हापूर जिल्हाध्यक्ष म्हणून कार्यरत होते. ३ सप्टेंबर म्हणजे काल समरजितसिंह घाटगे यांनी शरद पवारांच्या उपस्थितीत राष्ट्रवादीत प्रवेश केला.
