Maharashtra Politics : राष्ट्रवादी काँग्रेसच्या शरद पवार गटाला आणखी एक मोठा धक्का बसण्याची चिन्हे आहेत. शाहू ग्रुपचे अध्यक्ष समरजीत सिंह घाटगे हे लवकरच भाजपमध्ये घरवापसी करणार असल्याची माहिती समोर आली आहे. मिळालेल्या माहितीनुसार, येत्या ८ एप्रिल रोजी मुंबईत प्रदेशाध्यक्ष रवींद्र चव्हाण यांच्या उपस्थितीत घाटगे यांचा भाजपमध्ये अधिकृत प्रवेश होणार आहे. समरजीत घाटगे यांनी 2024 च्या विधानसभा निवडणुकीत महायुतीविरोधात लढत देत राष्ट्रवादी काँग्रेसचे नेते हसन मुश्रीफ यांच्याविरोधात निवडणूक लढवली होती. मात्र, आता बदललेल्या राजकीय समीकरणांमुळे घाटगे आणि मुश्रीफ हे एकाच बाजूला येण्याची शक्यता निर्माण झाली आहे. सूत्रांच्या माहितीनुसार, घाटगे लवकरच राष्ट्रवादी काँग्रेस शरदचंद्र पवार पक्षाचा राजीनामा देणार आहेत. गेल्या काही दिवसांपासून ते भाजपच्या बैठकींना उपस्थित राहत सक्रिय झाल्याचेही दिसून आले आहे. राज्यातील उच्च व तंत्र शिक्षण मंत्री चंद्रकांत पाटील यांचा आशीर्वाद घेत घाटगे यांनी पुन्हा भाजपमध्ये सक्रिय होण्यास सुरुवात केली होती. त्यांनी अलीकडेच भाजप कार्यालयात जाऊन पाटील यांची भेटही घेतली होती. विधानसभा निवडणुकीतील पराभवानंतर घाटगे भाजपमध्ये पुनरागमनासाठी प्रयत्न करत होते. सुरुवातीला वरिष्ठांकडून नकार मिळाल्यानंतरही चर्चेच्या अनेक फेऱ्यांनंतर अखेर त्यांचा पक्षप्रवेश निश्चित झाला आहे. या घडामोडींमुळे कोल्हापूरच्या राजकारणात पुन्हा एकदा मोठे बदल होण्याची शक्यता व्यक्त केली जात आहे.