Sai Sudharsan Ruled Out IND vs SL Test Series Devdutt Padikkal Number 3 Batter : भारत आणि श्रीलंका यांच्यातील दोन सामन्यांची कसोटी मालिका १५ ऑगस्टपासून सुरू होत आहे. मात्र, या मालिकेची पहिली घंटा वाजण्यापूर्वीच भारतीय क्रिकेट संघाला अत्यंत मोठा धक्का बसला आहे. भारताचा युवा आणि अत्यंत फॉर्ममध्ये असलेला डाव्या हाताचा फलंदाज साई सुदर्शन (Sai Sudharsan) दुखापत आणि फिटनेसच्या समस्येमुळे या संपूर्ण कसोटी मालिकेतून बाहेर पडला आहे. रेड-बॉल क्रिकेट आणि आयपीएलमध्ये धावांचा डोंगर उभारणाऱ्या सुदर्शनचे बाहेर पडणे भारतीय फलंदाजीसाठी मोठा फटका मानला जात आहे.

देवदत्त पडिक्कलची लागली लॉटरी –

साई सुदर्शन संघातून बाहेर पडल्यामुळे आता भारतीय अंतिम ११ (Playing XI) मधील तिसऱ्या क्रमांकाच्या (Number 3) फलंदाजीसाठी सर्व गणिते बदलली आहेत. कोलंबो येथील सराव सामन्यात श्रीलंका इलेव्हनविरुद्ध १२१ चेंडूंत १०३ धावांची धडाकेबाज शतकीय खेळी करणाऱ्या देवदत्त पडिक्कलची (Devdutt Padikkal) आता तिसऱ्या क्रमांकावर खेळण्याची दावेदारी सर्वाधिक भक्कम झाली आहे. सुदर्शनच्या अनुपस्थितीत पडिक्कलला कसोटी संघात स्वतःला सिद्ध करण्याची सुवर्णसंधी मिळणार आहे.

जबरदस्त फॉर्ममध्ये होता साई सुदर्शन!

Sai Sudharsan has been ruled out of the Test series against Sri Lanka. pic.twitter.com/SqyaEIBwU5

— Mufaddal Vohra (@mufaddal_vohra) August 8, 2026

गुजरात टायटन्ससाठी आयपीएल २०२६ मध्ये ७०० पेक्षा जास्त धावा करणाऱ्या साई सुदर्शनला २८ जुलै रोजी घोषित १५ सदस्यीय भारतीय संघात समाविष्ट करण्यात आले होते. मात्र, त्याची निवड ही फिटनेस क्लिअरन्सच्या अधीन होती. जूनमध्ये अफगाणिस्तानविरुद्धच्या एकमेव कसोटीत त्याने ८१ धावांची झुंझार खेळी केली होती. याशिवाय जून-जुलै महिन्यात ‘भारत-अ’ कडून खेळताना श्रीलंकेविरुद्ध गॉल येथे झालेल्या दोन्ही अनऑफिशियल कसोटी सामन्यांच्या पहिल्या डावात त्याने शानदार शतके झळकावली होती.

हेही वाचा – Devdutt Padikkal Century : श्रीलंकेत देवदत्त पडिक्कलचे धडाकेबाज शतक! सराव सामन्यात यजमान गोलंदाजांची केली धुलाई

साई सुदर्शन ४ ऑगस्टला उर्वरित भारतीय संघासोबत श्रीलंकेला रवाना झाला नव्हता आणि तो शनिवारी कोलंबो येथे पोहोचणे अपेक्षित होते. परंतु, आता तो पूर्ण मालिकेतून बाहेर पडल्याने निवड समिती (BCCI Selectors) लवकरच त्याच्या जागी नव्या खेळाडूच्या नावाची घोषणा करण्याची शक्यता आहे.