Yunus Shaikh : एमआयएम पक्षाची नगरसेविका सहर शेखचे वडील युनुस शेख यांनी एकनाथ शिंदे यांच्या शिवसेनेत प्रवेश केला आहे. ठाणे महानगरपालिकेच्या प्रभाग क्रमांक 30 मधून निवडून आल्यानंतर सहर शेख हिने ‘कैसा हराया…’ म्हणत ‘आपल्याला येणार्‍या काळात संपूर्ण मुंब्रा हिरव्या रंगाने व्यापून टाकायचा आहे,’ असे म्हटले होते. ज्यानंतर तिच्यावर भाजप नेत्यांकडून टीका करण्यात आली होती. ज्यात शिंदेसेनाचाही समावेश होता.

मात्र आता सहर शेखचे वडील युनुस शेख यांनी थेट शिंदेंच्या शिवसेनेत प्रवेश केला आहे. इतकेच काय तर युनुस शेख यांची शिंदे सेनेच्या कळवा-मुंब्रा केबल सेना अध्यक्ष म्हणून नियुक्ती करण्यात आली आहे. या नियुक्तीचे पत्र देतानाचा फोटोही समोर आला आहे. ही नियुक्ती एकनाथ शिंदे यांच्या आदेशाने करण्यात आल्याचा उल्लेख पत्रात आहे. शिवसेनेतील प्रवेश आणि त्‍यापाठोपाठ युनूस शेख यांना तत्‍काळ पदही देण्‍यात आल्‍याने मुंब्रातील राजकीय वर्तुळात चर्चांना उधाण आले आहे.

सहर शेख हिचे वडील युनुस शेख हे एकेकाळी जितेंद्र आव्हाड यांचे समर्थक होते. ठाणे महानगरपालिकेच्या निवडणुकीत युनुस शेख यांनी आपल्या मुलीसाठी शरद पवार गटाकडून उमेदवारी मागितली होती. मात्र, राष्ट्रवादीने उमेदवारी न दिल्यामुळे सहर शेख ही एमआयएमकडून निवडणुकीच्या रिंगणात उतरली आणि जिंकलीही होती. ही निवडणूक जिंकल्यानंतर विजयी सभेत युनुस शेख आणि सहर शेख या बाप-लेकीने जितेंद्र आव्हाड यांच्यावर जोरदार टीका केली होती.

हेही वाचा: 

Jailer 2 : हृतिक रोशनच्या स्वॅगवर चाहते फिदा! जेलर 2 मधील कॅमिओची जोरदार चर्चा; सोशल मीडियावर चाहत्यांच्या भन्नाट कमेंट