Hrithik Roshan’s cameo in Jailer 2 :  सुपरस्टार रजनीकांत यांचा बहुप्रतीक्षित चित्रपट ‘जेलर २’ प्रदर्शनाच्या पहिल्याच दिवसापासून चर्चेत आला आहे. चित्रपटातील दमदार अॅक्शन सीन्स, रजनीकांत यांची खास शैली आणि अनिरुद्ध रविचंद्रनचे जबरदस्त पार्श्वसंगीत यांना प्रेक्षकांकडून पसंती मिळत असल्याच्या प्रतिक्रिया सोशल मीडियावर पाहायला मिळत आहेत. विशेष म्हणजे, बॉलिवूड अभिनेता हृतिक रोशन याच्या कॅमिओचीही जोरदार चर्चा होत आहे.

रजनीकांतच्या अॅक्शनवर चाहते फिदा

‘जेलर २’ हा २०२३ मध्ये प्रदर्शित झालेल्या आणि प्रचंड लोकप्रिय ठरलेल्या ‘जेलर’ चित्रपटाचा सीक्वल आहे. या चित्रपटात रजनीकांत पुन्हा एकदा निवृत्त जेलर मुथुवेल पांडियन (टायगर) यांच्या भूमिकेत दिसत आहेत. त्यांच्या दमदार अभिनयासह अॅक्शन सीन्स आणि पडद्यावरील स्वॅग प्रेक्षकांना खेळवून ठेवत आहे.

चित्रपटाचे दिग्दर्शन नेल्सन दिलीपकुमार यांनी केले असून, अनिरुद्ध रविचंद्रनने आपल्या पार्श्वसंगीतातून चित्रपटातील अनेक प्रसंग अधिक प्रभावी करण्याचा प्रयत्न केला आहे. काही प्रेक्षकांनी चित्रपटाला ‘मास एंटरटेनर’ म्हटले आहे, तर काहींनी रजनीकांतच्या पडद्यावरील उपस्थितीचे विशेष कौतुक केले आहे.

ट्रेलरमध्ये झलक नव्हती, आता हृतिक रोशनच्या कॅमिओची चर्चा

चित्रपटाचा ट्रेलर प्रदर्शित झाला तेव्हा त्यात हृतिक रोशनची झलक पाहायला न मिळाल्याने काही चाहते नाराज झाले होते. मात्र, चित्रपटातील त्याच्या कॅमिओची चर्चा सुरू झाल्यानंतर सोशल मीडियावर विविध प्रतिक्रिया उमटत आहेत. हृतिकच्या कॅमिओमुळे मनोरंजनाची रंगत वाढल्याचे काही प्रेक्षकांचे मत आहे. रजनीकांत आणि हृतिक रोशन यांचा चहाच्या टपरीवरील सीनचे सर्वाधिक कौतुक केले जात आहे.

मात्र, सर्वच प्रतिक्रिया सकारात्मक नाहीत. काही प्रेक्षकांनी क्लायमॅक्समध्ये आणखी ट्विस्ट असायला हवे होते, असे मत व्यक्त केले आहे. काहींनी कथानकाची गती संथ असल्याचे म्हटले आहे. त्यामुळे चित्रपटाला एकीकडे अॅक्शन आणि स्टारकास्टसाठी दाद मिळत असताना, दुसरीकडे कथानक आणि शेवटाबाबत संमिश्र प्रतिक्रिया पाहायला मिळत आहेत.

दमदार स्टारकास्टमुळे वाढली उत्सुकता

‘जेलर २’मध्ये रजनीकांत यांच्यासोबत रम्या कृष्णन, योगी बाबू, जॅकी श्रॉफ, मोहनलाल आणि शिवराजकुमार यांसारखे कलाकार आहेत. याशिवाय विद्या बालन, मिथुन चक्रवर्ती, हृतिक रोशन आणि नोरा फतेही यांच्या कॅमिओ भूमिका आहेत.

Kriti Sanon : क्रिती सेनॉन हॉरर चित्रपटात दिसणार; नव्या प्रोजेक्टची अपडेट समोर