S. Jaishankar : संयुक्त राष्ट्राच्या आमसभेमध्ये दहशतवादाच्या मुद्दयावर भारताने पाकिस्तानची पोलखोल केली. सराईत दहशतवाद्यांकडून केलेले युक्तिवाद टिकणार नाहीत. दहशतवादाच्या परिणामांपासून सुरक्षित राहण्यासाठी प्रतिकारशक्तीचा दावा टिकू शकणार नाही, अशा शब्दात परराष्ट्र मंत्री एस. जयशंकर (S. Jaishankar) यांनी पाकिस्तानला सुनावले.

संयुक्त राष्ट्राच्या ८१ व्या आमसभेतील भारताचे निवेदन सादर करताना जयशंकर यांनी आंतरराष्ट्रीय जलमार्गातून प्रवास करणाऱ्या व्यापारी जहाजांवरील हल्ले आणि खलाशांच्या सुरक्षिततेचाही मुद्दा उपस्थित केला. असे हल्ले मान्य केले जाऊ शकत नसल्याचे ते म्हणाले.

आखातातील संघर्ष आणि युक्रेनमधील संघर्षामुळे एकसारखीच संकटाची परिस्थिती निर्माण केली आहे. याबद्दल चिंता व्यक्त करताना अंतहिन यद्धांनी आता युद्धाच्या अंताला मार्ग मोकळा करू दिला पाहिजे, असे आवाहनही जयशंकर (S. Jaishankar) यांनी जागतिक नेत्यांना केले.

शांतता राखण्यात आलेले अपयश केवळ सुरक्षेलाच धोका निर्माण करत नाही, तर प्रगतीलाही धोका निर्माण करत आहे आणि विकासाला खीळ घालत आहे. जागतिकीकरण झालेल्या जगात, युद्धाचे परिणाम जगभर जाणवतात. संघर्षांपासून दूर असलेल्या देशांना, त्यांची कोणतीही चूक नसताना शिक्षा भोगावी लागत आहे.

ज्यांच्यावर सर्वाधिक परिणाम होतो, त्यांनाच अनेकदा सर्वात कमी बोलण्याचा अधिकार असतो. या सभेने वास्तविक परिस्थितीचा सामना केलाच पाहिजे.
शांततेसाठी दहशतवादाचा विळखा हा एक सततचा धोका राहिला आहे. अशा कृत्यांमध्ये सामील असलेल्या सरकारांना जबाबदार धरले पाहिजे.

दहशतवादाबद्दलच्या आमच्या शून्य-सहिष्णुता दृष्टिकोनात कोणतीही शिथिलता येता कामा नये, असे आग्रही प्रतिपादन जयशंकर यांनी केले. पुरवठा साखळी आणि अन्न सुरक्षेच्या बाबतीत जगाला चिंता भेडसावते आहे. आखात, लाल समुद्र आणि काळ्या समुद्रातील जहाजांवर हल्ले होत आहेत. खलाशी मारले जात आहेत, हे अमान्य आहे.

आंतरराष्ट्रीय कायद्याचे पालन करत जहाजांच्या सुरक्षेप्रती तडजोड केली जाता कामा नये, याची काळजी घ्यायला हवी. यासाठी सागरी सुरक्षेसाठी भारताने लायबेरियाबरोबर मिळून अशा हल्ल्यांच्या विरोधात एक आघाडी उघडली असल्याचे जयशंकर यांनी सांगितले.

पॅलेस्टिनमधील संघर्षाबद्दल चिंता व्यक्त करताना द्विराष्ट्र तोडग्याला भारताचा पाठिंबा आहे. तसेच पॅलेस्टिनी लोकांसाठी बारताकडून मानवतावादी मदत आणि सहाय्य उपलब्ध करून दिले जात असल्याचेही त्यांनी (S. Jaishankar) नमूद केले.

केवळ युद्धाची अनुपस्थिती म्हणजे शांतता असू शकत नाही. धोका आणि तणावाच्या परिस्थितीमुळे आपण युद्धाच्या दिशेने एक पाऊल पुढे सरकत असतो. त्यासाठी सुरक्षा, स्थिरता आणि अंदाज करता येण्याजोगी शांतता आपल्याला अभिप्रेत आहे.जर कोणी या शांततेला कमी लेखत असेल, तर आपल्याला कमकुवत केले जाऊ शकते, असे ते म्हणाले.

जागतिक संस्थांमधील अकार्यक्षमतेमुळे शांतता आणि प्रगतीला धोका निर्माण होतो आहे. त्यामुळे सुधारणांच्या आधारे बहुपक्षीयतेची गरज दिवसेंदिवस वाढते आहे. आंतरराष्ट्रीय शांतता आणि सुरक्षेसाठी स्थापन झालेल्या संयुक्त राष्ट्राच्या नवव्या दशकाचा प्रारंभ होतो आहे. आता शांतता आणि सुरक्षेसाठी संयुक्त राष्ट्राने परिणामकारक सामुहिक कृती करण्याची गरज आहे.

कारण ज्या देशामध्ये संघर्ष नाही, त्यांनाही या संघर्षाचे परिणाम भोगावे लागत आहेत. पण त्यांचे म्हणणे ऐकून घेतले जात नाही. शांततेच्या दिशेने कोणताही मार्ग नाही. शांतता हाच एकमेव मार्ग आहे, असे महात्मा गांधी म्हणत असत, असे जयशंकर यांनी यावेळी सांगितले.

पाकिस्तानच्या दाव्यातील फोलपणा केला उघड
दहशतवादाच्या एका सराईत सूत्रधाराने या सभेसमोर वस्तुस्थिती चुकीच्या पद्धतीने मांडली. दहशतवादाला सामान्य ठरवण्यासाठी आणि त्याच्या परिणामांपासून मुक्ततेचा दावा करण्यासाठी युक्तिवाद केले गेले. ते खपवून घेतले जाणार नाही. दहशतवादाविरुद्ध स्वतःचा बचाव करण्याचा आमचा हक्क बजावला जाईल.

मैत्री आणि सदिच्छा दहशतवादासोबत नांदू शकत नाहीत. आणि त्यावर आधारित समजुतींवर स्वाभाविकपणेच प्रश्नचिन्ह उपस्थित केले जाईल. दहशतवादाच्या सूत्रधारानेच आपली वर्तणूक सुधारायला हवी, असे जयशंकर (S. Jaishankar) यांनी पाकिस्तानचा उल्लेख न करता सांगितले.