Pakistan – पाकिस्तानच्या खैबर पख्तुनख्वा आणि बलुचिस्तान प्रांतांमध्ये सुरक्षा दल आणि बंडखोरांमध्ये झालेल्या वेगवेगळ्या चकमकींमध्ये किमान २४ दहशतवादी ठार झाले. या चकमकींमध्ये एका अधिकाऱ्यासह चार जवान देखील मरण पावले.

शुक्रवारपासून, सशस्त्र दलांनी बलुचिस्तानमधील कोलपूर, करदागप आणि नुश्की परिसरात गुप्तचर माहितीवर आधारित अनेक मोहिमा केल्या आहेत.

शुक्रवार आणि शनिवारच्या मध्यरात्री, कोलपूर परिसरात सुरक्षा दलांनी एका आत्मघाती बॉम्बरसह टीटीपीच्या आठ दहशतवाद्यांना ठार केले आणि मोठ्या प्रमाणात शस्त्रसाठा व दारूगोळा जप्त केला.

दहशतवाद्यांनी सशस्त्र क्वाडकॉप्टरमधून गस्त घालणाऱ्या लष्करी वाहनांना लक्ष्य केले होते. या हल्ल्यात मेजर ओमर मिन्हास नासिर आणि हवालदार मुहम्मद अदनान खान ठार झाले, असे पाक सैन्यदलाने म्हटले आहे.

याव्यतिरिक्त दलांनी खैबर पख्तुनख्वाच्या उत्तर वझिरिस्तान जिल्ह्यातील मीर अली, दत्ता खेल आणि आसपासच्या परिसरातील ख्वारिजांच्या अनेक ठिकाणांवर कारवाई केली.

उत्तर वझिरिस्तानमधील अली खेल येथे झालेल्या कारवाईत १२ दहशतवादी ठार झाले, तर मीर अली आणि दत्ता खेल येथे प्रत्येकी दोन दहशतवादी मारले गेले.

हे दहशतवादी निष्पाप नागरिकांच्या हत्येसह अनेक दहशतवादी कारवायांमध्ये सहभागी होते. ठार झालेल्या दहशतवाद्यांकडून शस्त्रे आणि दारूगोळाही जप्त करण्यात आला.