Russia – द्रवरुप नैसर्गिक वायू वाहून नेणाऱ्या रशियाच्या मालवाहू जहाजावर आज अचानक स्फोट झाला आणि आगीने वेढलेले हे जहाज अखेर लीबियाजवळ भूमध्य समुद्रात बुडाले. लीबियाच्या अधिकाऱ्यांनी ही माहिती दिली. या दुर्घटनेमध्ये कोणतीही जीवितहानी झाली नाही. या टँकरमधून रशियाच्या तेलाची वाहतूक केली जात असल्यामुळे या टँकरवर पाश्चात्य देशांकडून निर्बंध घातले गेले होते. निर्बंध टाळण्यासाठी रशियाकडून छुप्या पद्धतीने आर्क्टिक मेटागाझ या टँकरमधून तेलाची वाहतूक केली जात असल्याचा संशय होता. मंगळवारी सकाळी या टँकरवर अचानक स्फोट झाला आणि टँकरला आग लागली, असे लीबियाच्या सागरी प्राधिकरणाच्या अधिकाऱ्यांनी सांगितले. स्फोट झाला, तेंव्हा हा टँकर लीबियातल्या सिर्ते शहराच्या किनाऱ्यापासून २४० किलोमीटर अंतरावर होता. या टँकरवर ६१ हजार टन एलएनजी होता. स्फोट आणि आगीनंतर हा टँकर एलएनजीच्या प्रचंड साठ्यासह लीबिया आणि माल्टा दरम्यान समुद्रात बुडाला. या जहाजावरील सर्व ३० खलाशांना वाचवण्यात आले असून दुसऱ्या बोटीतून लीबियातील बेन्गाझी शहरामध्ये नेण्यात आले आहे, असे निवेदनात म्हटले आहे. मेटागाझ हा तेलवाहक टँकर रशियाच्या वायव्येकडील मुर्मान्स्क शहरातून बेरेंन्ट समुद्रमार्गे इजिप्तमधील सैद या बंदराच्या दिशेने जात होता.
