Rupali Thombare on Ravindra Dhangekar। पुण्यातील पोर्श कार अपघाताचे पडसाद केवळ राज्यातच नाही तर संपूर्ण देशभरात पडल्याचे दिसून आले. अपघातानंतर घडलेल्या घटनांमुळे समाजात प्रशासनाविरोधात असंतोषाची लाट उसळली. दरम्यान, यावरून राजकीय आरोप-प्रत्यारोप देखील करण्यात आले. त्यातच पुण्याचे आमदार रवींद्र धंगेकरांनी सत्ताधाऱ्यांना धारेवर धरले. त्यांनी पुण्याचे पालकमंत्री अजित पवार यांच्यावर निशाणा साधला. त्यांनी केलेल्या टीकेला आता राष्ट्रवादी काँग्रेसकडून उत्तर देण्यात आले आहे.
‘ते’ महायुतीत आहेत हाच तुमचा त्रास Rupali Thombare on Ravindra Dhangekar।
आमदार रवींद्र धंगेकर यांनी गृहमंत्री देवेंद्र फडणवीसांनी उपमुख्यमंत्री अजित पवार यांना हात पाय बांधून पळायला लावलं आहे, अशी टीका केली होती. धंगेकरांच्या या टीकेला राष्ट्रवादी काँग्रेस पार्टीच्या अजित पवार गटातील नेत्या रुपाली पाटील-ठोंबरे यांनी प्रत्युत्तर दिलं आहे. रुपाली ठोंबरे यांनी त्यांच्या फेसबूक पोस्ट शेअर केलीय. यामध्ये म्हटलं आहे की, आमदार रवींद्र धंगेकरजी, देवेंद्र फडवणीस यांनी अजित पवारांचे हातपाय बांधले, असं तुम्ही बोलून गेलात पण तुम्हाला आठवण करून द्यायची आहे की हे तेच अजित पवार आहेत, जे महविकास आघाडीमध्ये असताना ज्यांनी तुमच्या आमदारकीसाठी हातपाय झटकून, तन, मन, धनाने जोरात काम केलं, आमच्यासारख्या कार्यकर्त्यांना जोमात काम करायला सांगितलं. अजित पवार हे सुशिक्षित, प्रशासनाचा दांडगा अनुभव असलेले, कर्तव्यदक्ष आणि काम करणारे नेते आहेत. आता अजित पवार हे महायुतीत आहेत हाच तुमचा त्रास आहे.” असा टोला त्यांनी लगावला.
पुढे रुपाली ठोंबरे यांनी, “देवेंद्र फडणवीस हे राज्याचे उपमुख्यमंत्री तथा गृहमंत्री आहेत. तर अजित पवार हे राज्याचे उपमुख्यमंत्री आणि पुणे जिल्ह्याचे पालकमंत्री देखील आहेत. पुण्यात एका अल्पवयीन मुलाकडून मद्यधुंद अवस्थेत हा अपघात घडला त्यात दोन तरुण मुलांचा दुर्दैवी मृत्यू झाला, भयाण आणि धक्कादायक घटनेनं पुणं हादरलं आहे. त्यात खुद्द त्या खात्याच्या प्रमुखाने, गृहमंत्री देवेंद्र फडणवीस यांनी पोलीस आयुक्तालयात जाऊन कडक कारवाईचे आदेश दिले, कर्तव्यात कसूर केलेल्या पोलिसांना निलंबित केले. महायुतीचे सरकार असल्याने अजित पवार आणि देवेंद्र फडवणीस यांच्यातील समन्वय, संवाद, एकत्र काम करण्याची दोघांची शैली तुम्ही पाहताय. याच्या तुम्हाला अधिक वेदना होत आहेत याची आम्हाला जाणीव आहे.” असे म्हटले.
नुसते राजकीय स्टंट नकोत Rupali Thombare on Ravindra Dhangekar।
त्याच बरोबर, “गृहमंत्र्यांनी कारवाईचे आदेश दिले म्हणजे पालकमंत्री यांच्याशी चर्चा करून एकत्रितपणे हा निर्णय घेतलेला असतो. तो तुम्हाला समजत नसेल किंवा समजूनसुद्धा फक्त विरोधक आहात म्हणून तुम्ही घडलेली घटना, गुन्हा न समजता विरोधक म्हणून केवळ टीका करत आहात. चांगले लोकप्रतिनिधी बनून आपलं पुणं, आपली युवा पिढी वाचवूया आणि घडवूया. नुसते राजकीय स्टंट नकोत. त्यामुळे कामाची दिशा भरकटत जाते. रवींद्र धंगेकरजी तुम्ही केलेल्या वक्तव्याचा जाहीर निषेध.” म्हणत धंगेकरांवर टीका केली.