Rupali Chakankar – वैष्णवी हगवणे आत्महत्या प्रकरणानंतर राज्यातील राजकीय वातावरण चांगलेच तापले आहे. या प्रकरणानंतर राज्य महिला आयोगाच्या अध्यक्षा रुपाली चाकणकर यांच्यावर सडकून टीका होत असून त्यांच्या राजीनामा देण्याची मागणी जोर धरू लागली आहे.

अशातच संगीता भालेराव या महिलेने थेट राज्य महिला आयोगातच रुपाली चाकणकर यांच्या विरोधात तक्रार दाखल केली आहे. विशेष म्हणजे, चाकणकरांकडून आपल्याला जीवाला धोका असल्याचा आरोप त्यांनी आपल्या तक्रारीत केला आहे.

दोन दिवसांपूर्वी रुपाली चाकणकर यांच्या समर्थक महिलेने संगीता भालेराव यांना फोन करुन धमकी दिल्याची ऑडिओ क्लिप व्हायरल झाली होती. राष्ट्रवादी काँग्रेस शरदचंद्र पवार पक्षाच्या महिला प्रदेशाध्यक्षा रोहिणी खडसे यांनीही ही क्लिप सोशल मीडियावर शेअर करत रुपाली चाकणकरांवर निशाणा साधला होता. आता संगीता भालेराव यांनी या प्रकरणी रुपाली चाकणकरांविरोधात महिला आयोगात तक्रार दाखल केली आहे.

मी चार-पाच दिवसांपूर्वी फेसबुकवर महिला आयोगाला सक्षम नेतृत्वाची गरज आहे, अशा आशयाची पोस्ट लिहिली होती. त्यामुळे रूपाली चाकणकर यांच्या कार्यकर्त्या व त्यांच्या पक्षाच्या पदाधिकारी सोनाली गाडे यांनी चिडून पदाची धमकी देत मला अनेक फोन केले. त्यातील एक फोन मी उचलला असता तिने धमकी व शिवीगाळ केली, असा आरोप संगीता भालेराव यांनी केला आहे.