प्रभात वृत्तसेवा
कोरेगाव – कोरेगाव येथील जिम व्यावसायिक सादिक कुरेशी याने रिपब्लिकन पार्टी ऑफ इंडियाच्या महिला आघाडीच्या प्रमुख पदाधिकारी सबिना शाहिद कुरेशी यांच्यावर केलेल्या हल्ल्याप्रकरणी पोलीस अधीक्षक तुषार दोशी यांना चौकशी करून कारवाई करण्याचे निर्देश राज्य महिला आयोगाच्या अध्यक्षा रूपाली चाकणकर यांनी दिले आहेत.सातारच्या जिल्हाधिकारी कार्यालयातील नियोजन भवनामध्ये गुरुवारी महिला आयोगाच्या जनसुनावणी कार्यक्रमांतर्गत सबिना शाहिद कुरेशी व शाहिद कुरेशी यांनी चाकणकर यांची भेट घेऊन निवेदन सादर केले व वस्तुस्थिती निदर्शनास आणून दिली.

चाकणकर यांनी या निवेदनाचे अवलोकन केल्यानंतर पोलीस अधीक्षक तुषार दोशी यांना तात्काळ याविषयी लक्ष घालावे, सामाजिक काम करणाऱ्या महिला कार्यकर्त्यावर अन्याय होत असेल, हल्ला होत असेल तर ते चुकीचे आहे. याप्रकरणी तातडीने चौकशी करून संबंधितांना न्याय द्यावा, असेही चाकणकर यांनी पोलीस अधीक्षकांना स्पष्टपणे सांगितले आहे.

कोरेगाव पोलिसांनी पूर्णपणे अन्याय करत विरोधकांना मदत केली असून खुनाचा प्रयत्न केल्याचा गुन्हा दाखल न करता केवळ अदखलपात्र गुन्ह्याची नोंद केली आहे. याप्रकरणी प्रांताधिकारी कार्यालयात आणि जिल्हाधिकारी कार्यालयात निवेदन सादर करून देखील कोणतीही कारवाई न झाल्याने अखेरीस रूपाली चाकणकर यांची भेट घेऊन त्यांच्यासमोर व्यथा मांडल्या, त्यांनी देखील यापुढे कोणताही अन्याय होणार नाही, याची दक्षता घेण्याचे आदेश पोलीस दलाला दिले असल्याचेही कुरेशी दांपत्याने सांगितले.