Rohit Pawar – व्हीएसआर कंपनी, डीजीसीए, अॅरो आणि इतर हे सर्वच या अपघाताला कारणीभूत असून त्यांना कोण वाचवतंय? हा तपास असाच दबावाखाली होत राहिला आणि यातील दोषींना वाचवण्याचा प्रयत्न झाला तर जनतेच्या संतापाचा कडेलोट होईल आणि त्याची जबाबदारी दबाव आणणार्यांना घ्यावी लागेल. या विषयात कुणी, कितीही अडथळे आणले तरी आम्ही मात्र थांबणार नाही. या अपघाताला कारणीभूत असलेल्यांना गजाआड केल्याशिवाय स्वस्थ बसणार नाही. राज्याचे माजी उपमुख्यमंत्री अजित पवार यांच्या दुर्दैवी विमान अपघाती निधनानंतर आता त्यांचे दोन्ही पुतणे, आमदार रोहित पवार आणि युगेंद्र पवार यांनी अत्यंत आक्रमक पवित्रा धारण केला आहे. या संपूर्ण घटनेची सखोल आणि पारदर्शक चौकशी व्हावी, तसेच या अपघातास जबाबदार असणार्या संबंधित विमान कंपन्या आणि अधिकार्यांवर तातडीने कठोर कारवाई करण्यात यावी, अशी जोरदार मागणी या दोघांकडून करण्यात येत आहे. विशेषतः व्हीएसआर या विमान कंपनीच्या विरोधात पोलिसांत रीतसर गुन्हा नोंदवण्यासाठी या दोन्ही बंधूंनी आज बारामती तालुका पोलीस ठाण्यात ठिय्या मांडला. यावेळी राजेंद्र पवार यांच्यासह मोठ्या संख्येने कार्यकर्ते उपस्थित होते. अजितदादा अमर रहे, सखोल चौकशी झालीच पाहिजे, अजित दादांना मिळालाच पाहिजे अशी जोरदार घोषणाबाजी कार्यकर्त्यांनी यावेळी केली. यावेळी युगेंद्र पवार, विकास लवांडे, अॅड. प्रसाद खारतुडे यांच्यासह स्थानिक पदाधिकारी आणि अजितदादांवर प्रेम करणारे नागरीक उपस्थित होते. अजित पवार विमान अपघात काल मुंबईत एफआयआर दाखल करुन घेण्यास पोलिसांनी नकार दिला. त्यामुळं ज्या पोलीस ठाण्याच्या हद्दीत ही घटना घडली त्या बारामती तालुका पोलीस ठाण्यात दादांवर प्रेम करणार्या सामान्य माणसांसह जाऊन सर्व कायदेशीर बाबी स्पष्ट करत याप्रकरणी एफआयआर दाखल करण्याची मागणी केली, परंतु इथंही दबावाखाली असलेल्या पोलिसांनी एफआयआर दाखल करुन घेण्यास असमर्थता दर्शवली. ही अजितदादांच्या मृत्यूची क्रूर चेष्टा असून ती कदापि खपवून घेतली जाणार नाही. दिवंगत उपमुख्यमंत्री अजित पवार यांच्या विमान अपघाताची सखोल चौकशी व्हावी यासाठी आमदार रोहित पवार यांनी कल मुंबई येथे तक्रार दाखल केल्यानंतर आज बारामती तालुका पोलीस ठाण्यात गुन्हा दाखल करण्याची मागणी केली. उपमुख्यमंत्री अजित पवार यांच्या विमान दुर्घटनेला जबाबदार धरत डीजीसीए विरोधात गुन्हा दाखल करून चौकशी व्हावी अशी मागणी रोहित पवार यांनी बारामती येथे केली. तालुका पोलीस ठाण्याबाहेर यावेळी हजारो कार्यकर्ते त्यांच्या बरोबर होते. अजित पवार यांचे चित्र व स्लोगन असलेल्या पाट्या हातात घेऊन कार्यकर्त्यांनी घोषणाबाजी करत ठिय्या मांडला. जोपर्यंत गुन्हा दाखल होत नाही तोपर्यंत इथून हलणार नाही अशी भूमिका रोहित पवार यांच्या सहकार्यकर्त्यांनी घेतली. अप्पर पोलीस अधीक्षक गणेश बिरादार तसेच उपविभागीय पोलीस अधिकारी सुदर्शन राठोड यांच्यासोबत आमदार रोहित पवार, योगेंद्र पवार तसेच जाणकार वकील मंडळींनी चर्चा केली. कायद्यानुसार गुन्हा दाखल करता येऊ शकतो अशी भूमिका यावेळी सर्वांनी घेतली. “अजितदादांच्या संशयास्पद अपघाती निधनाने लोकांमध्ये प्रचंड संतापाची लाट आहे. हा निव्वळ अपघात नाही तर व्हीएसआर कंपनीचा अक्षम्य निष्काळजीपणा आणि डीजीसीएकडून झालेलं दुर्लक्ष याला कारणीभूत असल्याचं खुद्द डीजीसीएच्या अहवालातूनच स्पष्ट झालं. तसंच विमान उडवण्यास हवामान योग्य असल्याचा ग्रीन सिग्नल देणारी अॅरो कंपनी या घटनेला तेवढीच कारणीभूत आहे. त्यामुळं कोणत्याही परिस्थितीत या सर्वांविरोधात एफआयआर दाखल झाला पाहिजे.” – रोहित पवार, आमदार
