Rohit Pawar : राज्यातील अपात्र आमदारांच्या अपात्रतेचा निर्णय राहुल नार्वेकर यांना घेण्याचे आदेश सर्वोच्च न्यायालायने  दिले आहेत.  विधानसभा अध्यक्षांनी वाजवी वेळेत हा निर्णय घ्यावा, असेही न्यायालयाने आपल्या निकालात म्हटले  होते. न्यायालयाने निर्णय देऊन आता सात महिने उलटली आहेत, तरीही विधानसभा अध्यक्षांनी अद्याप कोणताही निर्णय घेतला नाही.याच पार्श्वभूमीवर आता राष्ट्रवादी काँग्रेसचे आमदार रोहित पवार यांनी आपली प्रतिक्रिया दिली आहे.

एका वृत्तवाहिनीशी बोलताना रोहित पवार यांनी प्रतिक्रिया दिली आहे. १६ आमदारांच्या अपात्रतेबाबत निर्णय घेण्यास विधानसभा अध्यक्ष मुद्दाम विलंब करत असल्याचा आरोप विरोधी पक्षाच्या नेत्यांकडून केला जात आहे. दरम्यान, राहुल नार्वेकर यांचे दिल्ली दौरेही वाढले आहेत. दिल्लीत जाऊन ते महाराष्ट्राच्या सत्ता संघर्षाबाबत मार्गदर्शन घेतात. भाजपाच्या वरिष्ठ नेत्याच्या सल्ल्यानुसारच वागतात, असा आरोपही त्यांच्यावर केला जात आहे. यावर आता रोहित पवार यांनी विधानसभा अध्यक्ष राहुल नार्वेकर यांनी लोकशाहीच्या बाजूने निर्णय घेतला तर शिंदे गट अडचणीत येईल, असे सूचक वक्तव्य केले आहे.

त्यासोबतच तसेच नार्वेकर सातत्याने दिल्लीत जाऊन चर्चा करतात आणि मार्गदर्शन घेतात, ही बाब महाराष्ट्रातील नागरिकांना आवडणारी नाही, कारण महाराष्ट्र कधी दिल्लीसमोर झुकला नाही, असेही रोहित पवार यांनी यावेळी म्हटले आहे.

शिवसेनेच्या १६ आमदारांच्या अपात्रतेवर भाष्य करताना रोहित पवार म्हणाले, “मला एवढीच अपेक्षा आहे की, राहुल नार्वेकर यांनी हा निर्णय संविधानाच्या बाजूने घ्यावा. नार्वेकरांनी हा निर्णय घेण्यास बराच उशीर केला आहे. त्यामुळे मला त्यांना फक्त एकच विनंती करायची आहे. महाराष्ट्र कधी दिल्लीसमोर झुकला नाही आणि महाराष्ट्राचे विधानसभा अध्यक्ष सातत्याने दिल्लीला जाऊन चर्चा करत असतील आणि मार्गदर्शन घेत असतील, तर हे राज्यातील नागरिकांना आवडणारं नाही. ते लोकशाहीच्या बाजूने निर्णय घेणार असतील तर शिंदे गट अडचणीत येईल, असं मला वाटतं.” असेही त्यांनी यावेळी सांगितले.