पुणे : दिवाळीत रस्त्यावरील वाहतूक कमी झाली आहे. भरधाव वेगाने वाहन चालविल्यामुळे गंभीर स्वरूपाचे अपघात घडण्याची शक्यता असल्याने वाहतूक पोलिसांकडून वाहनचालकांना वेगमर्यादेचे पालन करण्याचे आवाहन करण्यात आले आहे.

दिवाळीत परगावाहून वास्तव्यास आलेले अनेकजण मूळगावी परतात, तसेच काहीजण पर्यटनासाठी बाहेरगावी जातात. अनेकजण मूळगावी रवाना झाल्याने शहरातील गजबलेल्या रस्त्यांवरील वाहतूक गेल्या दोन दिवसांपासून कमी झाली आहे. शहरातील गर्दीच्या रस्त्यावर सध्या शुकशुकाट पाहायला मिळत आहे. रस्ते मोकळे झाल्याने वाहनचालक भरधाव वेगाने जात असल्याचे दिसून आले आहे.यापार्श्वभूमीवर वाहतूक पोलिसांनी वाहनचालकांना सूचना दिल्या आहेत.

भरधाव वेगामुळे गंभीर स्वरूपाचे अपघात होण्याची शक्यता असल्याने वाहनचालकांनी वेगमर्यादेचे पालन करावे. मोकळे रस्ते म्हणजे सुरक्षित रस्ते, असा समज करून वाहनचालकांनी भरधाव वेगाने वाहने चालवू नयेत. वाहनचालकांनी सिग्नल मोडू नये. वाहन चालविताना मोबाइलवर संभाषण करू नये. मोटारचालकांनी सीटबेल्टचा वापर करावा. दुचाकीस्वारांनी हेल्मेट परिधान करावे. मद्यप्राशन करून वाहने चालवू नयेत, असे आवाहन वाहतूक शाखेचे पोलीस उपायुक्त हिंमत जाधव यांनी केले आहे.

पोलिसांच्या सूचना
– वाहनचालकांनी वेगमर्यादेचे पालन करावे
– सिग्नल तोडू नये
– मोटारचालकांनी सीटबेल्टचा वापर करावा
– दुचाकीस्वारांनी हेल्मेट परिधान करावे
– मद्यप्राशन करू वाहन चालवू नये

मोकळ्या रस्त्यांवर वाहनचालकांनी भरधाव वेगाने वाहने चालवून नये. दिवाळी सुरक्षितपणे साजरी करावी. वेगात नव्हे, तर सुरक्षिततेत आनंद आहे.
– हिंमत जाधव, पोलीस उपायुक्त, वाहतूक शाखा