Riyan Parag Injury : श्रीलंका दौऱ्यापूर्वी बीसीसीआयचा मोठा निर्णय! रियान पराग अचानक संघातून बाहेर; ‘या’ खेळाडूला बनवलं उपकर्णधार
Riyan Parag Injury : बीसीसीआयने श्रीलंकेच्या यजमानपदाखाली ९ जूनपासून 'अ' संघांमध्ये खेळल्या जाणाऱ्या तिरंगी मालिकेसाठी भारतीय संघाची घोषणा खूप पूर्वीच केली होती, ज्यात त्यांनी आता बदल जाहीर केला असून रियान परागच्या जागी दुसऱ्या खेळाडूचा समावेश केला आहे.
Riyan Parag Injury Replacement Ruturaj Gaikwad : श्रीलंका येथे ९ जूनपासून सुरू होणाऱ्या वन-डे तिरंगी (ट्राय) मालिकेसाठी भारतीय क्रिकेट नियामक मंडळाने इंडिया-ए संघात एक मोठा बदल केला आहे. या महत्त्वाच्या मालिकेसाठी आधी तिलक वर्माकडे कर्णधारपद, तर रियान परागकडे उपकर्णधारपद सोपवण्यात आले होते. मात्र, हॅमस्ट्रिंगच्या दुखापतीमुळे रियान पराग या मालिकेतून पूर्णपणे बाहेर पडला आहे. बीसीसीआयने त्याच्या जागी धडाकेबाज फलंदाज ऋतुराज गायकवाडचा संघात समावेश केला असून, त्याला संघाचा नवीन उपकर्णधारही बनवले आहे.
रियान पराग ‘सेंटर ऑफ एक्सलन्स’मध्ये जाणार; आयपीएलमध्येही झाला होता त्रास!
बीसीसीआयने दिलेल्या माहितीनुसार, रियान पराग हॅमस्ट्रिंगच्या दुखापतीतून पूर्णपणे बरा होईपर्यंत बंगळुरू येथील ‘सेंटर ऑफ एक्सलन्स’ मध्ये राहणार आहे, जिथे तो रिहॅबिलिटेशन प्रक्रिया पूर्ण करेल. नुकत्याच संपलेल्या आयपीएल २०२६ च्या हंगामात रियान पराग राजस्थान रॉयल्सचे नेतृत्व करत होता आणि त्याच्याच कप्तानीखाली संघ ‘क्वालिफायर-२’ पर्यंत पोहोचला होता. आयपीएल दरम्यानही त्याला या दुखापतीचा त्रास झाला होता, ज्यामुळे त्याला काही सामन्यांना मुकावे लागले होते. त्या सामन्यांमध्ये यशस्वी जैस्वालने राजस्थानची कप्तानी सांभाळली होती.
९ जूनपासून श्रीलंकेत रणसंग्राम; १५ वर्षांच्या वैभव सूर्यवंशीवर सर्वांच्या नजरा!
🚨JUST IN: RUTURAJ GAIKWAD REPLACES RIYAN PARAG, NAMED VICE-CAPTAIN OF INDIA A TEAM 🇮🇳
Riyan Parag is Out with a hamstring injury. 📉 pic.twitter.com/72ywFPEnhK
— TheWicketReport (@WicketReport) May 31, 2026
या वन-डे ट्राय सिरीजमध्ये भारत आणि श्रीलंकेच्या अ-संघांशिवाय तिसरा संघ अफगाणिस्तानचा असणार आहे. मालिकेतील पहिला सामना ९ जून रोजी खेळवला जाईल, तर महाअंतिम सामना २१ जून रोजी होणार आहे. या स्पर्धेत प्रत्येक संघाला एकमेकांविरुद्ध दोन-दोन सामने खेळण्याची संधी मिळणार आहे. हे सर्व सामने श्रीलंकेच्या दांबुला स्टेडियमवर खेळवले जातील आणि सामन्यांची सुरुवात भारतीय वेळेनुसार सकाळी १०:०० वाजता होईल. या संपूर्ण स्पर्धेत चाहत्यांच्या नजरा आयपीएल २०२६ मध्ये आपल्या बॅटने धुमाकूळ घालणाऱ्या १५ वर्षांच्या सलामीवीर वैभव सूर्यवंशीवर असतील.
तिरंगी मालिकेसाठी सुधारित इंडिया-ए संघ:
तिलक वर्मा (कर्णधार), ऋतुराज गायकवाड (उपकर्णधार), प्रियांश आर्या, वैभव सूर्यवंशी, आयुष बडोनी, निशांत सिंधू, सूर्यांश शेडगे, प्रभसिमरन सिंग (विकेटकीपर), कुमार कुशाग्र (विकेटकीपर), विपराज निगम, यश ठाकूर, युद्धवीर सिंग, अंशुल कंबोज, अर्शद खान, अनुकूल रॉय.
