Riteish Deshmukh : मुंबईतील ग्लॅमर, प्रसिद्धी आणि धावपळ बाजूला ठेवत अभिनेता रितेश देशमुख आणि जिनिलिया देशमुख यांनी यंदाची दिवाळी आपल्या माणसांसोबत, आपल्या मूळ गावी साजरी केली. लातूरमधील बाभळगावात देशमुख कुटुंबाचा दिवाळी सोहळा रंगला आणि या सेलिब्रेशनचे फोटो सोशल मीडियावर चर्चेचा विषय ठरले. मात्र या सगळ्यात सर्वाधिक चर्चा रंगली ती देशमुख कुटुंबातील तिन्ही सुनांच्या सासूबाई वैशालीताई यांच्यासोबतच्या खास सेल्फीची!

दिवाळीनिमित्त रितेश देशमुख, पत्नी जिनिलिया, मुलं रियान आणि राहिल यांच्यासह अमित देशमुख आणि धीरज देशमुख हेही आपल्या कुटुंबीयांसोबत बाभळगावातील घरी एकत्र आले होते. दिवंगत विलासराव देशमुख यांच्या कुटुंबाने पारंपरिक पद्धतीने लक्ष्मीपूजन आणि आरती करत दिवाळीचा आनंद साजरा केला.

रितेशने सोशल मीडियावर या खास क्षणांचे फोटो शेअर केले. भावांसोबतचे सेल्फी, मुलांसोबतचे आनंदी क्षण आणि संपूर्ण कुटुंबाचे फोटो पाहून चाहत्यांनीही या पोस्टवर प्रेमाचा वर्षाव केला.

सुनांचा सासूबाईंसोबतचा सेल्फी चर्चेत!

या दिवाळी सेलिब्रेशनमधील सर्वाधिक लक्षवेधी ठरला तो देशमुख कुटुंबातील तिन्ही सुनांचा खास फोटो. रितेशची पत्नी जिनिलिया, अमित देशमुख यांच्या पत्नी आणि धीरज देशमुख यांच्या पत्नी दीपशिखा यांनी सासूबाई वैशालीताई यांच्यासोबत सेल्फी काढला. या फोटोमधील आनंदी चेहरे आणि कौटुंबिक जिव्हाळ्याने सोशल मीडियावर चाहत्यांचे लक्ष वेधून घेतले.

 अमित देशमुख यांनीही दिल्या दिवाळीच्या शुभेच्छा

अमित देशमुख यांनीदेखील लक्ष्मीपूजनाचे फोटो सोशल मीडियावर शेअर केले. शेतकरी, कष्टकरी आणि सर्वसामान्यांच्या आयुष्यात सुख, समृद्धी आणि आनंद नांदो, अशी सदिच्छा त्यांनी व्यक्त केली. त्यामुळे देशमुख कुटुंबाची दिवाळी केवळ कौटुंबिक सेलिब्रेशन न राहता पारंपरिक मूल्यांची आठवण करून देणारी ठरली.

जिनिलियाने सांगितली होती देशमुख कुटुंबाची दिवाळी परंपरा

जिनिलियाने यापूर्वी एका मुलाखतीत देशमुख कुटुंबाच्या दिवाळीच्या खास परंपरेविषयी सांगितले होते. दरवर्षी संपूर्ण कुटुंब ट्रेनने लातूरला जाते आणि बाभळगावात एकत्र येऊन दिवाळी साजरी करते. आपल्या मुलांना शहरातील जीवनासोबतच गावाकडच्या संस्कृतीचा आणि वातावरणाचा अनुभव मिळावा, यासाठी रितेश आणि जिनिलिया प्रयत्नशील असतात.