Riteish Vilasrao Deshmukh: महाराष्ट्राचे दिवंगत माजी मुख्यमंत्री विलासराव देशमुख यांच्या पुण्यतिथीनिमित्त अभिनेता रितेश देशमुख भावुक झाला. १४ ऑगस्ट रोजी वडिलांच्या आठवणीत रितेश आणि पत्नी जिनिलीयाने सोशल मीडियावर काही खास फोटो शेअर केले. रितेशचं आपल्या वडिलांशी अतूट नातं होतं. ते सुनेला म्हणजेच जिनिलीयालाही आपली मुलगी मानायचे.

विलासराव देशमुख यांनी १९९९ ते २००३ आणि २००४ ते २००८ या कालावधीत दोन वेळा महाराष्ट्राचे मुख्यमंत्रीपद भूषवले. वडिलांच्या परवानगीनेच रितेशने राजकारणापेक्षा वेगळा मार्ग निवडत बॉलीवूडमध्ये पदार्पण केलं होतं. मात्र, सुरुवातीला अपयश आल्यास लोक मुख्यमंत्री वडिलांवर टीका करतील या भीतीने तो अस्वस्थ असायचा.

यावर विलासरावांनी दिलेला एक खास सल्ला त्याच्या आयुष्यात मार्गदर्शक ठरला. “माझ्या नावाची मी काळजी घेतो, तुझ्या नावाची तू काळजी घे.” हा सल्ला रितेशच्या आयुष्यातील टर्निंग पॉइंट ठरला असून, त्याने अनेक मुलाखतींमध्ये याचा उल्लेख केला आहे.

पुण्यतिथीनिमित्त रितेशने आपल्या मुलांसोबतचे फोटो शेअर करत कॅप्शन दिलं, “आजोबा, आमचं तुमच्यावर खूप प्रेम आहे… स्मृतिदिन.” फोटोमध्ये त्याची मुलं राहिल आणि रियान हात जोडून आजोबांना अभिवादन करताना दिसत आहेत.

रितेशच्या या पोस्टवर असंख्य चाहत्यांनी प्रतिक्रिया दिल्या,“मिस यू साहेब”, “प्रत्येक मराठी माणसाचा आत्मविश्वास होते साहेब… विनम्र अभिवादन”, “साहेबांसारखा नेता होणं नाही.”

दरम्यान, रितेश सध्या आपल्या बहुचर्चित ‘राज शिवाजी’ या चित्रपटाच्या कामात व्यस्त आहे. पुढच्या वर्षी प्रदर्शित होणाऱ्या या चित्रपटाचं दिग्दर्शन तो स्वतः करत असून, यात दिग्गज कलाकारांची फौज प्रेक्षकांना पाहायला मिळणार आहे.