Tata Sons Meeting : मीठ ते सॉफ्टवेअर उद्योगापर्यंत विस्तारलेल्या टाटा सन्स समूहाची होल्डिंग कंपनी असलेल्या टाटा सन्सच्या संचालक मंडळाची बैठक संपन्न झाली.

टाटा ट्रस्ट्सचे अध्यक्ष नोएल टाटा यांच्यासह संचालक मंडळाचे सदस्य व टाटा सन्सचे अध्यक्ष एन. चंद्रशेखरन यांनी दक्षिण मुंबईतील समूहाच्या मुख्यालयातून बाहेर पडताना, माध्यमांशी संवाद साधला नाही. टाटा समूहातील वाढत्या मतभेदांच्या पार्श्वभूमीवर झालेल्या या संचालक मंडळाच्या बैठकीत चंद्रशेखरन यांच्या पुनर्नियुक्तीवर चर्चा होण्याची शक्यता कमी आहे.

चंद्रशेखरन आणि नोएल टाटा, हे समूहाच्या कंपन्यांच्या कामगिरीसंदर्भात चर्चा करण्यासाठी आठवड्याच्या शेवटी भेटले असल्याचे समजते. आर्थिक वर्ष 2025 मध्ये टाटा समूहाच्या असूचीबद्ध व्यवसायांना 10,905 कोटी रुपयांचा तोटा झाला असून, हा तोटा 29,000 कोटी रुपयांपर्यंत वाढण्याची शक्यता आहे.

हेही वाचा –   तैवानने शेअर बाजार मूल्यात भारताला टाकले मागे; एआय चिप्सच्या तेजीमुळे 4.95 ट्रिलियन डॉलर्सचा टप्पा 

नोएल टाटा हे टाटा सन्सच्या वाढत्या तोट्याबद्दल चिंतित आहेत. हा तोटा विशेषतः चंद्रशेखरन यांच्या नेतृत्वाखाली सुरू केलेल्या टाटा डिजिटल आणि इलेक्ट्रॉनिक्स उद्योगांसारख्या नवीन व्यवसायांमुळे, तसेच काही वर्षांपूर्वी सरकारकडून खरेदी केलेल्या आर्थिक अडचणीत असलेल्या एअर इंडियामुळे होत आहे. नोएल टाटा हे टाटा सन्सला आयपीओद्वारे सार्वजनिक करण्यासही तयार नाहीत.

सध्या, टाटा सन्स या प्रमुख गुंतवणूक कंपनीचे, आरबीआयने सूचीबद्ध होणे अनिवार्य असलेल्या 15 बिगर-बँक वित्तीय कंपन्यांमध्ये वर्गीकरण केले आहे. नोएल टाटा यांचे पुत्र नेव्हिल टाटा यांना समूहाशी संबंधित काही ट्रस्ट किंवा फाऊंडेशन्समध्ये आधीच समाविष्ट करण्यात आले आहे.