अमृतसर – पंजाबमध्ये सतत वाढणाऱ्या उष्णतेच्या लाटेने गहू उत्पादक शेतकरी चिंतेत पडले आहेत. साधारणत: फेब्रुवारी महिन्यात तापमानात थोडीशी वाढ होते, त्यामुळे गहू पिकावर परिणाम होत नाही. मात्र, यंदा थंडीच्या काळातही तापमानात फारशी घट न होण्याची शक्‍यता असून पावसाअभावी गव्हाच्या दाण्याच्या आकारमानावर वाईट परिणाम होणार आहे.

कपूरथला जिल्ह्यातील शेतकरी परविंदर सिंग यांच्याप्रमाणेच राज्यातील बहुतांश गहू उत्पादक शेतकरी सध्या चिंतेत आहेत. या पिकाला (गहू) फार उष्ण दिवस लागत नसल्याचे शेतकरी सांगतात. अनेक दिवस तापमान सामान्यापेक्षा जास्त राहिल्यास त्याचा गहू पिकावर विपरीत परिणाम होऊ शकतो.

विशेष म्हणजे, पंजाब आणि हरियाणामध्ये कमाल तापमान अनेक दिवसांपासून सामान्य मर्यादेपेक्षा वर जात असताना, किमान तापमानातही वाढ नोंदवण्यात आली आहे. मात्र, गेल्या दोन-तीन दिवसांपासून किमान तापमान नेहमीच्या जवळपास होते. भारतीय किसान युनियनचे (एकता उग्रहण) सरचिटणीस सुखदेव सिंग कोकरिकलन म्हणतात की, ‘अचानक तापमानात वाढ आणि अनेक दिवस सतत राहिल्याने धान्याच्या गुणवत्तेवर आणि उत्पादनावर परिणाम होऊ शकतो’.

ते म्हणाले की, चांगली गोष्ट म्हणजे गेल्या काही दिवसांपासून किमान तापमानात किरकोळ घट झाली आहे आणि सकाळची थंडी आहे. तरीही, दुपारच्या वेळी उष्ण हवामान ही यावेळी मोठी चिंतेची बाब आहे.

पंजाबचे कृषी संचालक गुरविंदर सिंग म्हणतात की सध्या परिस्थिती चिंताजनक नाही. शेतकऱ्यांना आवश्‍यकतेनुसार हलके सिंचन करण्याचा सल्ला देण्यात आला आहे. ज्या शेतकऱ्यांकडे स्प्रिंकलर सिंचनाची सुविधा आहे ते तापमानात आणखी वाढ झाल्यास दुपारी 25-30 मिनिटे स्प्रिंकलरने आपल्या शेताला पाणी देऊ शकतात. ज्या शेतकऱ्यांनी मल्चिंग पद्धतीने गव्हाची पेरणी केली आहे, त्यांना तापमानवाढीचा फारसा फटका बसणार नाही.

हरियाणाचे कृषी मंत्री जेपी दलाल म्हणतात की, मार्चच्या मध्यात कमाल तापमानात वाढ होत राहिल्यास, शेतकऱ्यांना हलक्‍या सिंचनासारख्या उपाययोजना करण्यासाठी तयार राहण्याचा सल्ला देण्यात आला असल,ा तरी सध्या परिस्थिती चिंताजनक नाही.