Rinku Meets Modi : क्रिकेट आणि राजकारणाचा शाही संगम! रिंकू सिंगने सहकुटुंब पंतप्रधान मोदींची भेट घेत दिले लग्नाचे निमंत्रण
Rinku Meets Modi : रिंकू सिंग समाजवादी पक्षाच्या खासदार प्रिया सरोज यांच्याशी विवाहबद्ध होत आहे, पण त्याने पंतप्रधान मोदी आणि मुख्यमंत्री योगी आदित्यनाथ यांच्यासह भाजपच्या अनेक प्रमुख नेत्यांना आमंत्रित केले आहे.
Rinku Singh Priya Saroj Wedding Invitation PM Narendra Modi Yogi Adityanath Lucknow : भारतीय क्रिकेट संघाचा स्फोटक फलंदाज रिंकू सिंग लवकरच आयुष्याची नवी इनिंग सुरू करणार आहे. रिंकू सिंगने आपल्या कुटुंबासमवेत पंतप्रधान नरेंद्र मोदी यांची सदिच्छा भेट घेऊन त्यांना आपल्या विवाहाचे निमंत्रण दिले. या खास भेटीचे फोटो सोशल मीडियावर समोर आले असून, त्यामध्ये रिंकू आपल्या कुटुंबीयांसह पंतप्रधानांना पुष्पगुच्छ आणि पत्रिका देताना दिसत आहे. रिंकू सिंग समाजवादी पक्षाच्या तरुण खासदार प्रिया सरोज यांच्याशी विवाहबद्ध होणार असून, क्रिकेट आणि राजकारण यांचा हा अनोखा संगम सध्या सर्वत्र चर्चेचा विषय ठरला आहे.
४ डिसेंबरला लखनौच्या रमाडा हॉटेलमध्ये पार पडणार विवाह सोहळा –
रिंकू सिंग आणि प्रिया सरोज यांचा शाही विवाह सोहळा येत्या ४ डिसेंबर २०२६ रोजी लखनौ येथील रमाडा हॉटेलमध्ये पार पडणार आहे. दोन्ही कुटुंबांमध्ये लग्नाची जय्यत तयारी सुरू झाली आहे. पंतप्रधानांना निमंत्रण दिल्यानंतर रिंकूने फोटो शेअर करत लिहिले की, “कुटुंबासह पंतप्रधान नरेंद्र मोदींची भेट घेऊन, त्यांना लग्नाचे निमंत्रण देऊन आणि त्यांचे आशीर्वाद घेऊन खूप सन्मानित वाटत आहे; हा आमच्यासाठी खरोखरच अविस्मरणीय क्षण आहे.”
जून २०२५ मध्ये झाला होता साखरपुडा; व्यस्त वेळापत्रकामुळे लांबले होते लग्न
View this post on Instagram
या दोघांचा साखरपुडा यापूर्वी ८ जून २०२५ रोजी लखनौच्या ‘द सेंट्रम’ हॉटेलमध्ये मोठ्या थाटामाटात पार पडला होता. क्रिकेटच्या व्यस्त वेळापत्रकामुळे लग्नाची तारीख पुढे ढकलली जात होती, मात्र आता अखेर ४ डिसेंबरचा मुहूर्त निश्चित झाला आहे. प्रिया सरोज या २०२४ च्या लोकसभा निवडणुकीत उत्तर प्रदेशातील मछलीशहर मतदारसंघातून निवडून आल्या आहेत, तर रिंकू आयपीएलमध्ये कोलकाता नाईट रायडर्सचे प्रतिनिधित्व करतो.
मुख्यमंत्री योगी आदित्यनाथ यांच्यासह विराट-रोहितलाही निमंत्रण
या हाय-प्रोफाइल विवाह सोहळ्यासाठी क्रीडा आणि राजकीय क्षेत्रातील दिग्गजांना निमंत्रित केले जात आहे. रिंकूच्या कुटुंबीयांनी उत्तर प्रदेशचे मुख्यमंत्री योगी आदित्यनाथ यांचीही प्रत्यक्ष भेट घेऊन लग्नाची पत्रिका दिली आहे. मीडिया रिपोर्ट्सनुसार, या विवाहासाठी विराट कोहली, रोहित शर्मा, मुख्य प्रशिक्षक गौतम गंभीर आणि बीसीसीआय उपाध्यक्ष राजीव शुक्ला यांनाही खास निमंत्रण पाठवण्यात आले आहे.
