पुणे : सिंहगड किल्ल्यावर फिरायला गेलेल्या पुणे पोलीस दलातील निवृत्त सहायक पोलीस आयुक्त राजकुमार गायकवाड (वय ६२) यांचे हृदयविकाराच्या झटक्याने अकस्मात निधन झाले. या घटनेने पोलीस दलात हळहळ व्यक्त होत असून, त्यांच्या निधनाने पुणे पोलीस दलात शोककळा पसरली आहे.

पोलिसांनी दिलेल्या माहितीनुसार, गायकवाड हे आतकरवाडीमार्गे सिंहगड किल्ल्यावर सहकाऱ्यांसह फिरायला गेले होते. किल्ला चढत असताना त्यांना अचानक छातीत तीव्र वेदना जाणवू लागल्या. त्यांनी याबाबत सहकाऱ्यांना माहिती दिली, परंतु काही समजण्याच्या आत ते बेशुद्ध पडले. त्यांच्यासोबत असलेल्या डॉक्टर मित्राने तातडीने प्राथमिक उपचार केले, परंतु गायकवाड यांनी प्रतिसाद दिला नाही. घटनेची माहिती मिळताच वनविभागाचे कर्मचारी समाधान पाटील आणि वनरक्षकांनी घटनास्थळी धाव घेतली. गायकवाड यांना स्ट्रेचरद्वारे किल्ल्यावरून खाली आणण्यात आले आणि तातडीने खासगी रुग्णालयात दाखल करण्यात आले. मात्र, उपचारापूर्वीच त्यांचा मृत्यू झाल्याचे डॉक्टरांनी घोषित केले.

गायकवाड हे मूळ पुण्याचे रहिवासी असून, सध्या कुटुंबासह मार्केट यार्ड परिसरात राहत होते. मनमिळाऊ स्वभावासाठी ओळखले जाणारे गायकवाड यांनी स्वारगेट पोलीस ठाण्यात वरिष्ठ पोलीस निरीक्षक म्हणून सेवा बजावली होती. तसेच, बृहन्मुंबई पोलीस दलातही त्यांनी महत्त्वपूर्ण योगदान दिले होते. त्यांच्या अकस्मात निधनाने पोलीस दलातील सहकाऱ्यांमध्ये शोक व्यक्त होत आहे.

या घटनेची नोंद हवेली पोलीस ठाण्यात अकस्मात मृत्यू म्हणून करण्यात आली आहे. पोलिसांनी पंचनामा करून मृतदेह शवविच्छेदनासाठी पाठवला असून, पुढील तपास सुरू आहे. गायकवाड यांच्या निधनाने पोलीस दलातील एक अनुभवी आणि प्रिय व्यक्तिमत्त्व हरपल्याची भावना व्यक्त होत आहे.