Metro : बाणेरची दोन मेट्रो स्थानके डिसेंबरमध्ये खुली होणार; सुरक्षा तपासणीनंतर प्रवासी सेवा सुरू होण्याची शक्यता;
जानेवारी २०२७ पर्यंत संपूर्ण मार्ग कार्यान्वित करण्याचे पीएमआरडीएचे उद्दिष्ट

पिंपरी – हिंजवडी आयटी हब ते शिवाजीनगरदरम्यान धावणाऱ्या पुणेरी मेट्रो मार्गावरील बाणेर गाव आणि बाणेर-पाषाण लिंक रोड ही दोन स्थानके डिसेंबरमध्ये प्रवाशांच्या सेवेत दाखल होण्याची शक्यता आहे. या दोन्ही स्थानकांचे बांधकाम पूर्ण झाले असून, सध्या सुरक्षा तपासणीपूर्वीची प्रक्रिया सुरू आहे.
मेट्रो रेल्वे सुरक्षा आयुक्तांकडून (सीएमआरएस) हिरवा कंदील मिळाल्यानंतरच प्रवासी सेवा सुरू केली जाणार आहे. सीएमआरएसचे पथक याच आठवड्यात मार्गाची पाहणी करणार आहे.
या तपासणीत काही त्रुटी आढळल्यास त्या दूर करण्यासाठी सवलतकारांना आणखी १० ते १२ दिवसांचा कालावधी लागू शकतो. त्यामुळे सुरक्षा तपासणी आणि आवश्यक पूर्तता वेळेत झाल्यास डिसेंबरमध्ये दोन्ही स्थानके सुरू होऊ शकतात, अशी माहिती पीएमआरडीएच्या वरिष्ठ अधिकाऱ्यांनी दिली.
बाणेर गाव (पीएमआर-१५) आणि बाणेर-पाषाण लिंक रोड (पीएमआर-१६) ही स्थानके सुरू झाल्यानंतर २३.३ किलोमीटरच्या मेट्रो मार्गावरील कार्यरत स्थानकांची संख्या १७ वरून १९ होणार आहे. उर्वरित चार स्थानके जानेवारी २०२७ पर्यंत टप्प्याटप्प्याने सुरू करण्याचे नियोजन आहे. त्यानंतर या मार्गावरील सर्व २३ स्थानके प्रवाशांसाठी खुली होतील.
दरम्यान, मेट्रोचा विस्तार होत असताना वाहनतळांचा प्रश्नही ऐरणीवर आला आहे. मेट्रो स्थानकांजवळ वाहनतळांची सुविधा उपलब्ध करून देण्यासाठी पीएमआरडीएने पुणे महापालिकेकडे आठ जागांची मागणी केली आहे. यातील बहुतांश जागा बाणेर आणि बालेवाडी परिसरातील आहेत. महापालिकेने जागांसंदर्भातील अटी आणि मोबदल्याचे पर्याय पीएमआरडीएकडे सादर केले असून, पुढील कार्यवाही सुरू आहे.
महापालिकेच्या आकडेवारीनुसार, सार्वजनिक वाहनतळांसाठी आरक्षित १३७ भूखंडांपैकी केवळ ३१ भूखंड विकसित झाले आहेत. तसेच, मेट्रो स्थानकांजवळ वाहनतळांसाठी निश्चित केलेल्या २० जागांपैकी पाच ठिकाणी सुविधा उभारण्यात आली आहे.
वाहनतळांच्या अभावामुळे प्रवासी रस्त्याच्या कडेला आणि मेट्रो मार्गाखाली वाहने लावत असल्याने वाहतूक कोंडी वाढत आहे. त्यामुळे मेट्रो स्थानकांपर्यंत पोहोचण्यासाठी वाहनतळांची सुविधा उपलब्ध झाल्यास खासगी वाहनांचा वापर कमी होऊन सार्वजनिक वाहतुकीला चालना मिळण्याची अपेक्षा आहे.





