Farmers loan – ऐन दिवाळीच्या तोंडावर राज्यातील शेतकऱ्यांसाठी सरकारने कर्जमुक्ती योजनेचा विशेष हप्ता वितरीत केला आहे. या योजनेअंतर्गत बुधवारी ४ लाख ८६ हजार शेतकऱ्यांच्या बँक खात्यांवर तब्बल ४,७६४ कोटी रुपयांचा निधी थेट वर्ग करण्यात आला.

यात सर्वाधिक २ लाख ७६ हजार लाभार्थी हे दुष्काळग्रस्त मराठवाड्यातील आहेत, अशी माहिती मुख्यमंत्री देवेंद्र फडणवीस यांनी दिली. आतापर्यंत राज्यातील २१ लाख शेतकऱ्यांना कर्जमुक्तीचा प्रत्यक्ष लाभ मिळाला असून उर्वरित पात्र लाभार्थ्यांच्या याद्यांची पडताळणी वेगाने सुरू आहे.

राज्यात यंदा अपुऱ्या पावसामुळे उत्पन्न घटल्याने सरकारने ८५ टक्के भाग दुष्काळग्रस्त घोषित केला आहे. या पार्श्वभूमीवर, दिवाळीपूर्वी ७३ लाख शेतकऱ्यांच्या खात्यांत प्रत्येकी ५,००० रुपयांची आगाऊ मदत जमा करण्यात आली आहे.

बँक खात्यांमधील तांत्रिक अडचणींमुळे काही शेतकऱ्यांचे वाटप प्रलंबित असले, तरी येत्या दोन दिवसांत ९५ टक्के पात्र लाभार्थ्यांपर्यंत ही रक्कम पोहोचेल, अशी ग्वाही मुख्यमंत्र्यांनी दिली.

तसेच, सरकार बळीराजाच्या पाठीशी ठामपणे उभे असल्याचे दर्शवण्यासाठी राज्य मंत्रिमंडळातील सर्व मंत्री शेतकऱ्यांच्या घरी जाऊन दिवाळी साजरी करणार आहेत.

मराठवाड्याला हक्काचे सात टीएमसी पाणी

अनेक वर्षांपासून पाण्यासंदर्भात वंचित राहिलेल्या मराठवाडा भागाला महायुती सरकारने हक्काचे सात टीएमसी पाणी मंजूर केले आहे. या प्रकल्पाचे काम अंतिम टप्प्यात आले असून लवकरच पाणी उपलब्ध होईल. या निर्णयाचा सर्वाधिक फायदा धाराशिव आणि बीड जिल्ह्यांना होणार असल्याचे फडणवीस म्हणाले.