Radhika Apte : अभिनेत्री राधिका आपटे आपल्या बेधडक स्वभावासाठी आणि स्पष्टवक्तेपणासाठी ओळखली जाते. आपल्या अभिनयाच्या जोरावर मराठी, हिंदी आणि दक्षिण भारतीय चित्रपटसृष्टीत वेगळी ओळख निर्माण करणाऱ्या राधिकाने आता तिच्या करिअरमधील एका जुन्या अनुभवाचा असा काही खुलासा केला आहे, ज्यामुळे मनोरंजनविश्वात चर्चांना उधाण आलं आहे.

एका तेलुगू चित्रपटात साकारलेल्या भूमिकेचा उल्लेख करताना तिने चक्क त्या सिनेमातील प्रत्येक गोष्टीचा तिरस्कार वाटत असल्याचं सांगितलं. या चित्रपटात तिला वयाने बऱ्याच मोठ्या अभिनेत्यासोबत रोमान्स करावा लागला होता. चित्रपटातील कथानक, नातेसंबंध आणि सेटवरील पितृसत्ताक वातावरण यामुळे हा अनुभव तिच्यासाठी अत्यंत कठीण ठरल्याचंही तिने स्पष्ट केलं.

राधिका आपटे सध्या नेटफ्लिक्सवरील ‘अक्का’ या सीरिजमुळे चर्चेत आहे. या सीरिजमध्ये तिच्यासोबत अभिनेत्री कीर्ती सुरेशही महत्त्वाच्या भूमिकेत दिसत आहे. दोघीही सीरिजच्या प्रमोशनसाठी विविध मुलाखती देत आहेत. अशाच एका मुलाखतीदरम्यान राधिकाला तिच्या करिअरमधील सर्वात आव्हानात्मक भूमिकेबद्दल विचारण्यात आलं.

यावर तिने एका तेलुगू चित्रपटातील अनुभव सांगितला. राधिका म्हणाली, ‘मी एका तेलुगू चित्रपटात काम केलं होतं, ज्यात मला माझ्या मामाशी लग्न करावं लागलं होतं. ती माझ्या कारकिर्दीतील सर्वात आव्हानात्मक भूमिका होती. त्या चित्रपटातील प्रत्येक गोष्टीचा मला तिटकारा होता.”

राधिकाचं उत्तर ऐकून कीर्ती सुरेशला सुरुवातीला आश्चर्य वाटलं, मात्र नंतर ती जोरात हसू लागली. त्यानंतर राधिकाने तिथल्या सांस्कृतिक प्रथेबद्दल सांगितलं. “मामाशी लग्न करण्याची प्रथा तमिळ आणि तेलुगू समाजात खूप प्रचलित आहे.” असं अभिनेत्री म्हणाली.

ती पुढे म्हणाली, ‘हो, पण मला एका खूप वयस्कर अभिनेत्यासोबत रोमान्स करावा लागला होता. तिथलं वातावरण आणि ती जागा खूप पुरुषप्रधान आहे. माझ्यासाठी हा अनुभव अत्यंत कठीण होता. त्यानंतर चित्रपटात माझा मृत्यू होतो. मला खांद्यावरून फेकून दिलं जाणार होतं आणि मग अॅक्शन सुरू होणार होती. मी विचार करत होते की, माझा मृत्यू नेमका कधी होणार?”

नेमका कोणता होता तो चित्रपट?

राधिकाने मुलाखतीत चित्रपटाचं नाव स्पष्टपणे सांगितलेलं नाही. मात्र, तिने सांगितलेल्या कथानकातील प्रसंग आणि तिच्या भूमिकेचे तपशील पाहता चाहत्यांनी २०१४ मध्ये प्रदर्शित झालेल्या ‘लीजेंड’ या तेलुगू चित्रपटाशी तिच्या वक्तव्याचा संबंध जोडला आहे. बोयापती श्रीनू यांनी या चित्रपटाचं दिग्दर्शन केलं होतं. यामध्ये नंदमुरी बालकृष्ण मुख्य भूमिकेत होते. या चित्रपटात राधिका आपटेने महत्त्वाची भूमिका साकारली होती.

तिच्या पात्राचा संबंध मामाच्या मुलाशी म्हणजेच ‘बावा’शी दाखवण्यात आला होता. चित्रपट प्रदर्शित झाला, तेव्हा नंदमुरी बालकृष्ण यांचं वय ५४ वर्षे होतं, तर राधिका आपटे २९ वर्षांची होती. दोघांमध्ये तब्बल २५ वर्षांचं वयाचं अंतर होतं. त्यामुळे राधिकाने मुलाखतीत सांगितलेल्या वयातील फरकाच्या संदर्भावरूनही ‘लीजेंड’ चित्रपटाची चर्चा रंगली आहे.