Yogi Adityanath – काँग्रेसचे नेते राहुल गांधी यांची तुलना उत्तर प्रदेशचे मुख्यमंत्री योगी आदित्यनाथ यांनी फटाक्यातील वात विझलेल्या रॉकेटशी केली. काँग्रेसने राहुल गांधी यांना राष्ट्रीय नेते म्हणून प्रस्थापित करण्यासाठी वारंवार राजकीय लॉन्चिंग केले, मात्र प्रत्येक वेळी हा प्रयत्न अपयशी ठरला, असा घणाघाती टोला त्यांनी लगावला. गोरखपूर येथे आयोजित लोकतंत्र वाचवा, अराजकता हटवा या एनडीएच्या रॅलीत ते बोलत होते.

सभेला संबोधित करताना योगी आदित्यनाथ म्हणाले, दिवाळीत आपण अनेकदा रॉकेट उडवतो. पण काही रॉकेटची वात पेटवल्यानंतरही ते उडत नाहीत. लोक आकाशाकडे पाहत राहतात, पण ते रॉकेट तिथेच राहून फक्त धूर सोडते आणि विझून जाते. राहुल गांधी यांची परिस्थिती अगदी तशीच आहे.

राहुल गांधी यांना प्रस्थापित करण्यासाठी काँग्रेसने केलेल्या प्रयत्नांची यादी मांडत योगी म्हणाले की २००४ ते पहिल्यांदा लोकसभा खासदार झाले. २००७ मध्ये त्यांना पक्षाचे सरचिटणीस पद देण्यात आले. २०१३ मध्ये राहुल यांना कॉंग्रेसचे उपाध्यक्ष बनवले. २०१७ साली त्यांची पक्षाध्यक्षपदी निवड झाली. २०१९ या वर्षी अमेठी लोकसभा मतदारसंघातून त्यांचा पराभव झाला.

पराभवानंतरही काँग्रेसने त्यांच्या प्रतिमेसाठी भारत जोडो यात्रा, न्याय यात्रा आणि अधिकार यात्रा आयोजित केल्या. राहुल गांधी आता ५६ वर्षांचे झाले आहेत, तरीही त्यांना अजूनही तरुण नेते म्हणून सादर केले जात आहे. हे रॉकेट कधीही टेक-ऑफ करू शकणार नाही, असा टोलाही त्यांनी लगावला.

समाजवादी पक्षाचे अध्यक्ष अखिलेश यादव यांच्या पुढची पिढी प्रत्येक लाठी आणि जखमेचा बदला घेईल या विधानाचाही मुख्यमंत्री योगी आदित्यनाथ यांनी खरपूस समाचार घेतला.

लोकशाहीत सूडबुद्धीला जागा नसते, तर लोकशाही म्हणजे जनतेने निवडणुकीच्या माध्यमातून आणलेला बदल असतो, असे स्पष्ट करत त्यांनी २०१४ च्या लोकसभा आणि २०१७ च्या उत्तर प्रदेश विधानसभा निवडणुकीतील सत्तांतराचा दाखला दिला.या रॅलीला भाजपचे राष्ट्रीय अध्यक्ष नितीन नवीन, प्रदेशाध्यक्ष पंकज चौधरी आणि एनडीएचे अनेक प्रमुख नेते उपस्थित होते.