Today TOP 10 News: महापालिका महापौर आरक्षण जाहीर; मुंबई-पुण्यासह 9 शहरांत ‘महिला राज’

 

 

राज्यातील २९ महानगरपालिकांच्या महापौरपदाचे बहुप्रतीक्षित आरक्षण आज २२ जानेवारी रोजी जाहीर झालेय. या सोडतीनुसार मुंबई, पुणे, नागपूर आणि नाशिक यांसारख्या महत्त्वाच्या शहरांमध्ये महापौरपद खुल्या प्रवर्गातील महिलांसाठी राखीव झालेय.

राज्यातील एकूण ९ महापालिकांत महिलांचे वर्चस्व राहणार असून १७ महापालिकांचे नेतृत्व खुल्या प्रवर्गाकडे असेल. ठाणे, जालना आणि लातूरमध्ये अनुसूचित जाती, तर कल्याण-डोंबिवलीमध्ये अनुसूचित जमातीसाठी पद आरक्षित झालेय. कोल्हापूर, उल्हासनगर, इचलकरंजी, पनवेलमध्ये ओबीसी प्रवर्गाला संधी मिळालीय.

दरम्यान, मुंबईतील आरक्षणावर ठाकरे गटाने चक्राकार पद्धत पाळली नसल्याचा आरोप करत जोरदार आक्षेप घेतल्याने प्रशासकीय वर्तुळात गोंधळ उडाला होता.

मुख्यमंत्री इतके असहाय्य आहेत का? महाड राडा प्रकरणी उच्च न्यायालयाचे ताशेरे

महाड नगरपरिषद निवडणुकीतील राड्याप्रकरणी आरोपींना अटक करण्यात अपयश आल्याने मुंबई उच्च न्यायालयाने राज्य सरकारवर तीव्र शब्दांत ताशेरे ओढलेत.

मंत्री भरत गोगावले यांचा मुलगा विकास गोगावले याच्यासह इतर मुख्य आरोपी अटकपूर्व जामीन फेटाळूनही अद्याप मोकाट असल्याने न्यायालयाने संताप व्यक्त केला. “मुख्यमंत्री इतके असहाय्य आहेत का?” असा थेट सवाल करत न्यायालयाने सरकारला धारेवर धरले.

जर इच्छाशक्ती असेल तर पोलीस २४ तासांत अटक करू शकतात, मात्र राजकीय दबावामुळे केवळ वेळकाढूपणा केला जात असल्याचे निरीक्षण न्यायालयाने नोंदवले.

कायद्याची अंमलबजावणी निवडक लोकांसाठी वेगळी आहे का, असा प्रश्न उपस्थित करत न्यायालयाने मुख्यमंत्री आणि संबंधित मंत्र्यांकडून थेट सूचना घेण्याचे निर्देश दिलेत. या प्रकरणाने राज्यातील कायदा-सुव्यवस्थेच्या स्थितीवर मोठे प्रश्नचिन्ह निर्माण झालेय.

लष्कराचे वाहन दरीत कोसळून 10 जवान शहीद; 11 जखमींवर उपचार सुरू

जम्मू-काश्मीरमधील डोडा जिल्ह्यात गुरुवारी एक भीषण रस्ते अपघात झाला. लष्कराचे वाहन ४०० फूट खोल दरीत कोसळल्याने १० जवानांना वीरमरण आले, तर ११ जवान गंभीर जखमी झालेत.

हे वाहन २१ जवानांना घेऊन डोडा येथून एका उंचीवरील चौकीकडे जात होते. भद्रवाह-चंबा मार्गावरील खन्नी टॉपजवळ चालकाचे नियंत्रण सुटल्याने हा अपघात घडला. जखमी जवानांना तातडीने एअरलिफ्ट करून उधमपूर येथील मिलिटरी हॉस्पिटलमध्ये दाखल करण्यात आलेय.

या घटनेवर संरक्षण मंत्री राजनाथ सिंह, मुख्यमंत्री उमर अब्दुल्ला यांनी तीव्र दुःख व्यक्त करत शहीद जवानांना श्रद्धांजली वाहिली. जखमींना सर्वोत्तम वैद्यकीय उपचार देण्याचे निर्देश प्रशासनाला देण्यात आलेत.

दरम्यान, तीन दिवसांपूर्वीच किश्तवाडमध्ये दहशतवाद्यांशी लढताना एक जवान शहीद झाला असताना, या अपघाताने लष्करावर शोककळा पसरलीय.

दावोसमध्ये ‘बोर्ड ऑफ पीस’ची घोषणा; पाकिस्तानसह 20 देशांच्या स्वाक्षऱ्या

जागतिक संघर्षांवर तोडगा काढण्यासाठी अमेरिकेचे राष्ट्राध्यक्ष डोनाल्ड ट्रम्प यांनी स्वित्झर्लंडमधील दावोस येथे ‘बोर्ड ऑफ पीस’ या आंतरराष्ट्रीय संस्थेची अधिकृत घोषणा केली.

गाझा युद्धविराम आणि तेथील पुनर्निर्माणाच्या उद्देशाने सुरू झालेल्या या उपक्रमात आता रशिया-युक्रेन वादासारख्या जागतिक मुद्द्यांचाही समावेश करण्यात आलाय. पाकिस्तानचे पंतप्रधान शहबाज शरीफ यांच्यासह सौदी अरब, तुर्की आणि अर्जेंटिनासारख्या २० हून अधिक देशांनी यावर स्वाक्षऱ्या केल्यात. ट्रम्प स्वतः या बोर्डाचे आजीवन अध्यक्ष असतील.

विशेष म्हणजे, भारत, चीन, ब्रिटन आणि फ्रान्स यांसारख्या प्रमुख देशांनी सध्या या बोर्डापासून अंतर राखलेय. संयुक्त राष्ट्रांच्या अस्तित्वाला या बोर्डामुळे धोका निर्माण होऊ शकतो, अशी भीती युरोपीय देशांनी व्यक्त केलीय.

या बोर्डाच्या सदस्यत्वासाठी 1 अब्ज डॉलर्सचे शुल्क निश्चित करण्यात आले असून, ट्रम्प यांनी याला जगातील ‘सर्वात प्रतिष्ठित’ गट म्हटलेय.

सोने – चांदीच्या किंमती घसरल्या; डोनाल्ड ट्रम्प यांच्या निर्णयाचा मोठा परिणाम

जागतिक बाजारपेठेतील घडामोडींमुळे गुरुवारी मौल्यवान धातूंच्या किमतीत मोठी घसरण पाहायला मिळाली.

अमेरिकेचे राष्ट्राध्यक्ष डोनाल्ड ट्रम्प यांनी युरोपीय नाटो देशांवरील टॅरिफबाबत मवाळ भूमिका घेतल्याने आणि ग्रीनलँड संदर्भात सकारात्मक घोषणा केल्याने गुंतवणूकदारांचा उत्साह वाढला असून सुरक्षित गुंतवणूक म्हणून ओळखल्या जाणाऱ्या सोन्याची झळाळी कमी झालीय.

मल्टी कमोडिटी एक्सचेंजवर सोन्याच्या दरात प्रति १० ग्रॅममागे २३०० रुपयांची घट झाली, तर चांदीच्या दराने प्रति किलो तब्बल १३,००० रुपयांची ऐतिहासिक घसरण नोंदवली. या अनपेक्षित बदलामुळे सराफा बाजारात मोठी खळबळ उडाली.

घसरणीनंतर सोने 1,49,477 रुपये प्रति 10 ग्राम तर चांदी MCX वर 3,05,753 रुपये प्रति किलोवर पोहोचली. याआधी काल बुधवारी एकवेळ चांदीने 3 लाख 34 हजार रुपयांपर्यंत झेप घेतली होती.

15 लाखांपर्यंतचे उत्पन्न करमुक्त होणार? नोकरदारांच्या नजरा अर्थमंत्र्यांच्या घोषणेकडे

आगामी केंद्रीय अर्थसंकल्पाच्या पार्श्वभूमीवर करदात्यांमध्ये मोठ्या अपेक्षा निर्माण झाल्या असून विशेषतः प्राप्तिकर सवलतीच्या मर्यादेबाबत मोठी चर्चा सुरू आहे.

सध्याची १२ लाख रुपयांची करमुक्त मर्यादा वाढवून ती १५ लाख रुपये केली जाण्याची शक्यता वर्तवण्यात येतेय. अर्थतज्ज्ञांच्या मते, सरकार नवीन टॅक्स रिजीम अधिक आकर्षक बनवण्यासाठी या प्रणालीत महत्त्वपूर्ण सवलती जाहीर करू शकते.

यामुळे खाजगी क्षेत्रातील कर्मचाऱ्यांना मोठा दिलासा मिळून त्यांच्या हातातील उत्पन्नात वाढ होईल. यासोबतच फूड डिलिव्हरी आणि कॅब सेवा देणाऱ्या गिग वर्कर्ससाठी स्वस्त आरोग्य विमा योजनांची घोषणा होण्याची चिन्हे आहेत.

१ फेब्रुवारी रोजी अर्थमंत्री निर्मला सीतारामन या सवलतींची अधिकृत घोषणा करतील, ज्याकडे संपूर्ण देशाचे लक्ष लागलेय.

8व्या वेतन आयोगासाठी 3.5 फिटमेंट फॅक्टरची मागणी; वार्षिक 5 टक्के दरवाढीचाही प्रस्ताव

८ व्या वेतन आयोगाबाबतची चर्चा आता निर्णायक वळणावर पोहोचली असून FNPO फेडरेशन ऑफ नॅशनल पोस्टल ऑर्गनायझेशनने केंद्र सरकारकडे मागण्या मांडल्यात.

संघटनेने नॅशनल कौन्सिलला पाठवलेल्या ६० पानांच्या सविस्तर पत्रात अ, ब, क, ड वर्गातील कर्मचाऱ्यांसाठी फिटमेंट फॅक्टर ३ ते ३.५ च्या दरम्यान ठेवण्याची आग्रही मागणी केलीय. सध्याची ३ टक्के वार्षिक वेतनवाढ महागाईच्या तुलनेत अत्यंत कमी असल्याचे नमूद करत, विशेषतः क आणि ड गटातील कर्मचाऱ्यांसाठी ही वाढ ५ टक्के करण्याची शिफारस करण्यात आलीय.

आगामी २५ फेब्रुवारी रोजी होणाऱ्या बैठकीत या मागण्यांचा मसुदा तयार करून तो वेतन आयोगाच्या अध्यक्षा रंजना प्रकाश देसाई यांच्याकडे सोपवला जाणार आहे. जर ३.० फिटमेंट फॅक्टर मान्य झाला, तर निम्म्याहून अधिक कर्मचाऱ्यांच्या मूळ वेतनात मोठी वाढ होऊन किमान वेतन ५४,००० रुपयांपर्यंत पोहोचण्याची शक्यता वर्तवण्यात येतेय.

शेअर बाजारात 3 दिवसानंतर तेजी; गुंतवणूकदारांची 4.5 लाख कोटींची कमाई

गेल्या तीन दिवसांच्या घसरणीनंतर गुरुवारी भारतीय शेअर बाजारात मोठी सुधारणा पाहायला मिळाली. अमेरिकेचे राष्ट्राध्यक्ष डोनाल्ड ट्रम्प यांनी युरोपीय देशांवरील प्रस्तावित टॅरिफला स्थगिती दिल्याने जागतिक बाजारात सकारात्मक वातावरण निर्माण झाले.

याचा थेट परिणाम मुंबई शेअर बाजारावर झाला. व्यवहारअंती बीएसई सेन्सेक्स ३९८ अंकांच्या वाढीसह ८२,३०७ वर, तर निफ्टी १३२ अंकांनी वधारून २५,२९० वर बंद झाला. या तेजीमुळे गुंतवणूकदारांच्या संपत्तीत ४.४८ लाख कोटी रुपयांची भर पडली आहे.

मेटल्स, आयटी आणि बँकिंग क्षेत्रातील शेअर्समध्ये सर्वाधिक खरेदी दिसून आली. भारत इलेक्ट्रॉनिक्स आणि टाटा स्टीलच्या शेअर्सनी मोठी झेप घेतली, तर इटरनल आणि टायटनच्या शेअरमध्ये घसरण नोंदवण्यात आली. बाजारातील या चौफेर वाढीमुळे गुंतवणूकदारांना मोठा दिलासा मिळालाय.

तमिळनाडू विधानसभा निवडणूक अभिनेते रिंगणात; विजयला ‘शिट्टी’ तर कमल हासन यांना ‘बॅटरी टॉर्च’ चिन्ह

तमिळनाडूमध्ये आगामी विधानसभा निवडणुकीचे बिगुल वाजण्यापूर्वीच राजकीय हालचालींना वेग आला असून, निवडणूक आयोगाने दोन दिग्गज अभिनेत्यांच्या पक्षांना निवडणूक चिन्हांचे वाटप केलेय.

दाक्षिणात्य सुपरस्टार थलपती विजय याच्या ‘तमिळगा वेट्री कझगम’ TVK पक्षाला ‘शिट्टी’ हे चिन्ह मिळाले, तर ज्येष्ठ अभिनेते कमल हासन यांच्या ‘मक्कल निधी मय्यम’ MNM पक्षाला ‘बॅटरी टॉर्च’ हे चिन्ह देण्यात आलेय. विजयने २०२४ मध्ये आपल्या पक्षाची स्थापना केली असून, या निवडणुकीच्या माध्यमातून तो प्रत्यक्ष राजकारणात पदार्पण करतोय.

दुसरीकडे, कमल हासन यांचा पक्ष गेल्या काही निवडणुकांपासून रिंगणात असून त्यांनी जुनेच चिन्ह मिळवण्यात यश मिळवले. मुख्यमंत्री एम.के. स्टालिन यांची सत्ता रोखण्यासाठी भाजपसह हे दोन्ही अभिनेते मैदानात उतरल्याने यंदाची निवडणूक चुरशीची ठरणार आहे.

रणजी ट्रॉफीत सर्फराझ खानचे शानदार शतक; शुबमन गिल ठरला अपयशी

रणजी ट्रॉफीच्या हंगामात भारतीय खेळाडूंची संमिश्र कामगिरी पाहायला मिळाली. मुंबईकडून खेळणाऱ्या सर्फराझ खानने हैदराबादविरुद्ध आक्रमक फलंदाजी करत शानदार शतक ठोकले. ६१ प्रथम श्रेणी सामन्यांत १७ शतके झळकावूनही सर्फराझ सध्या टीम इंडियाबाहेर आहे, त्यामुळे या शतकाद्वारे त्याने पुनरागमनाची दावेदारी भक्कम केलीय. दुसरीकडे, कसोटी कर्णधार शुबमन गिल पंजाबकडून खेळताना सौराष्ट्रविरुद्ध अवघ्या दोन चेंडूंत शून्यावर बाद झाला. सर्फराझच्या सातत्यपूर्ण कामगिरीमुळे त्याला पुन्हा भारतीय कसोटी संघात स्थान मिळणार का, याकडे आता सर्वांचे लक्ष लागलेय.

हेही वाचा  – Stock Market Today: शेअर बाजारात 3 दिवसांनंतर परतली तेजी; सेन्सेक्स 398 अंकांनी वधारला, गुंतवणूकदारांनी कमावले 4.5 लाख कोटी