Ravindra Dhangekar : भाजप नेते आणि राज्याचे उच्च व तंत्रशिक्षण मंत्री चंद्रकांत पाटील यांच्या कोल्हापुरातील भाषणाचा समाचार घेत माजी आमदार रवींद्र धंगेकर (Ravindra Dhangekar) यांनी त्यांच्यावर अत्यंत तिखट शब्दांत निशाणा साधला आहे. “चंद्रकांत पाटलांचे भाषण म्हणजे नळावरच्या भांडणासारखे होते,” असा घणाघात करत धंगेकर यांनी भाजपच्या कार्यपद्धतीवर आणि चंद्रकांत पाटील यांच्या वक्तव्यांवर कडाडून टीका केली.

“लोकांना किळस येईल एवढा माज करू नका”
चंद्रकांत पाटलांच्या भाषणावर प्रतिक्रिया देताना रवींद्र धंगेकर (Ravindra Dhangekar) म्हणाले, “याव करील, ट्याव करील, आमकं करील, तमकं करील… सत्ता तुमचीही जाणार आहे, हे ध्यानात ठेवलं पाहिजे. लोकांना किळस येईल एवढा माज कुणीही केला नाही पाहिजे.”

धंगेकर यांनी पुढे इशारा देत म्हटले की, “एखाद्या कुटुंबाच्या वैयक्तिक व्यवसायावर जाणे ही चंद्रकांत पाटलांची जुनी खोड आहे. पण एक दिवस असा येईल की चौकाचौकात जनता तुम्हाला जाब विचारेल. त्यावेळी उत्तरे देताना नाकीनऊ येईल. केस एका बाजूला, धोतर दुसऱ्या बाजूला आणि चष्मा भलतीकडेच पडेल! तो काळ फार लांब नाही, अत्यंत जवळ आला आहे. त्यामुळे जनतेला अशा धमक्या देणे बंद करा.”

“तुम्ही शबनम बॅग घेऊन चहाची वाट पाहायचा; काय किर्लोस्करचे नातू होता का?”
चंद्रकांत पाटील यांच्या जुन्या दिवसांची आठवण करून देत धंगेकर म्हणाले, “हॉटेलच्या बाहेर उभे राहून कोणी चहा पाजतोय का, याची वाट तुम्ही बघायचा; हे महाराष्ट्राने पाहिले आहे. त्यांचे वडील स्कूटरवर फिरायचे. खांद्यावर शबनम बॅग घेऊन तुम्ही हॉटेलबाहेर उभे असायचा, ही परिस्थिती जनतेला ठाऊक आहे. तुम्ही काय किर्लोस्करचे नातू वगैरे आहात का?” काँग्रेस आणि भाजपमधील घडामोडींवरून टोला लगावताना ते पुढे म्हणाले, “काँग्रेसमध्ये काय चालतं आणि भाजपमध्ये काय घडतं, हे दादांनाच सर्वात आधी समजतं. त्यांना विचारल्याशिवाय काही घडतच नाही, असा त्यांचा थाट असतो.”

ठाकरे बंधू एकत्र येणार? धंगेकरांचे मोठं विधान
यावेळी राज ठाकरे आणि उद्धव ठाकरे यांच्या संभाव्य राजकीय एकत्रीकरणावर भाष्य करताना रवींद्र धंगेकर यांनी महत्त्वाचे विधान केले. “मराठी माणसं एकत्र आली तर नक्कीच सर्वांना आनंद होईल, किंबहुना मराठी माणसाच्या हितासाठी त्यांनी एकत्र आलेच पाहिजे, हे सर्वांचेच मत आहे. जर राजकारणात मेहबूबा मुफ्ती आणि भाजप एकत्र येऊ शकतात, तर ठाकरे बंधू का एकत्र येऊ शकत नाहीत? एक रक्ताचा, वडिलांचा वारसदार आहे तर दुसरा विचारांचा वारसदार आहे. दोघांमध्ये काही फार अंतर राहिलेले नाही, अंतर अगदी कमी आहे आणि ते एकत्र येणे नक्कीच घडून येईल,” असा विश्वास त्यांनी (Ravindra Dhangekar) व्यक्त केला.