Lapata Ladies | Ravi Kishan | Amir Khan : ऑस्कर 2025 साठी परदेशी भाषा श्रेणीमध्ये ‘लापता लेडीज’ची निवड झाली आहे. हा चित्रपट ऑस्कर एंट्रीमुळे प्रसिद्धीझोतात आला आहे. या चित्रपटात रवी किशननं पोलिसची भूमिका साकारली होती. यात रवी किशनचा खाकी वर्दीमधील जबरदस्त अभिनय पाहायला मिळाला आहे. या सिनेमासाठी अभिनेता रवी किशनला सर्वोत्कृष्ट सहाय्यक अभिनेत्याचा आयफा पुरस्कार देखील मिळाला आहे. अश्यातच रवी किशन याने अभिनेता आमिर खानचा एक व्हिडिओ सोशल मीडियावर पोस्ट केला आहे. आमिर खान सुद्धा या पोलिसाच्या भूमिकेसाठी ऑडिशन देत असल्याचं यातून दिसून येत आहे. या भूमिकेसाठी आधी आमिरला कास्ट केले जाणार होते, त्यासंबंधीच्या ऑडिशनचा हा व्हिडिओ आहे. रवीच्या या पोस्टवर अनेक प्रकारच्या प्रतिक्रिया येत आहेत. अभिनेता रवी किशनच्या या पोस्टवर युजर्स विविध प्रतिक्रिया देत आहेत. नेटकऱ्यांनी रवीच्या अभिनयाचे कौतुक केले. शेअर केलेल्या पोस्टमध्ये एका वापरकर्त्याने लिहिले की, भाऊकाल रवी भैया. तर दुसऱ्या एका वापरकर्त्याने लिहिले की ‘तुमच्यापेक्षा चांगले कोणीही करू शकत नाही’. अशा अनेक कमेंट या व्हिडिओवर नेटकरी करत आहेत. तसेच, आमिरने देखील त्याच्या अधिकृत युट्युब चॅनलवर हा व्हिडिओ पोस्ट केला आहे. ‘लापता लेडीज’ या चित्रपटाची निर्मिती आमिर खानने केली आहे. त्याचबरोबर या चित्रपटात प्रतिभा रंता, नितांशी गोयल, स्पर्श श्रीवास्तव, रवी किशन, छाया कदम यांच्यासह अनेक कलाकारांनी महत्त्वाच्या भूमिका साकारल्या आहेत. रवी किशनचा कार्यकाळ : अभिनेत्याच्या कामाबद्दल बोलायचे झाले तर, भोजपुरी व्यतिरिक्त, त्याने हिंदी चित्रपटांमध्येही उत्तम चित्रपट केले आहेत. अलिकडेच त्याला ‘लापता लेडीज’ चित्रपटातील त्याच्या उत्कृष्ट अभिनयासाठी सर्वोत्कृष्ट सहाय्यक अभिनेत्याचा किताब मिळाला. रवी किशन यांनी ‘जेएनयू’, ‘सिंघम अगेन’, ‘लपता लेडीज’ सारख्या अनेक उत्तम चित्रपटांमध्ये काम केले आहे. रवी किशन भाजपचे गोरखपूर येथील खासदार सुद्धा आहेत.
