दहा दुष्काळग्रस्त तालुक्यांत मोफत धान्य वाटप
Ration shop: – राज्यात निर्माण झालेल्या दुष्काळी परिस्थितीच्या पार्श्वभूमीवर पुणे जिल्ह्यातील १० दुष्काळग्रस्त तालुक्यांमधील पात्र लाभार्थ्यांना मोफत अन्नधान्य पुरवठा करण्याची प्रक्रिया वेगाने सुरू झाली आहे.

या मोहिमेचे सर्वात महत्त्वाचे वैशिष्ट्य म्हणजे रोजगार अथवा पाण्याच्या शोधात स्थलांतर करणाऱ्या कुटुंबांनाही ‘वन नेशन, वन रेशन कार्ड’ योजनेच्या पोर्टेबिलिटी सुविधेमुळे कोणत्याही रास्तभाव दुकानातून धान्य घेता येणार आहे.

जिल्ह्यातील एकही पात्र कुटुंब हक्काच्या अन्नधान्यापासून वंचित राहणार नाही, याची पूर्ण दक्षता घेतली जात असल्याची माहिती जिल्हा पुरवठा अधिकारी महेश सुधळकर यांनी दिली.

जून ते सप्टेंबर २०२६ या कालावधीत पडलेल्या पावसाच्या तुटीमुळे राज्यातील ३०४ तालुक्यांमध्ये खरीप हंगामासाठी दुष्काळ जाहीर करण्यात आला आहे. त्या अनुषंगाने अन्न, नागरी पुरवठा व ग्राहक संरक्षण विभागाने मार्गदर्शक सूचना जारी केल्या आहेत.

राष्ट्रीय अन्नसुरक्षा कायदा, २०१३ अंतर्गत पात्र लाभार्थ्यांना मोफत अन्नधान्याचा पुरवठा विनाविलंब करण्याचे निर्देश प्रशासनाला देण्यात आले आहेत. जे नागरिक या योजनेत समाविष्ट नाहीत, परंतु दुष्काळामुळे मदतीची गरज आहे, अशा कुटुंबांचा अंत्योदय अन्न योजना किंवा प्राधान्य कुटुंब प्रवर्गात समावेश केला जाणार आहे. यासाठी शिधापत्रिकेतील सर्व सदस्यांचे आधार संलग्नीकरण पूर्ण करून तातडीने धान्य देण्याची कार्यवाही सुरू आहे.

स्थलांतरित शेतमजूर व नागरिकांसाठी ई-पॉस उपकरणाद्वारे बायोमेट्रिक ओळख पटवून पोर्टेबिलिटी सुविधेद्वारे सुलभ धान्य वितरणाची व्यवस्था करण्यात आली आहे. याशिवाय, ‘मिशन सुधार’ अंतर्गत रद्द झालेल्या शिधापत्रिकांचा कोटा विचारात घेऊन गरजू कुटुंबांना नवीन शिधापत्रिकांचे वाटप केले जात आहे. अन्नधान्याचा काळाबाजार, अवैध साठेबाजी किंवा गैरव्यवहार रोखण्यासाठी पुरवठा विभागाने यंत्रणा सज्‍ज ठेवली आहे.