मुंबई  – Ratan Tata funeral: भारतीय औद्योगिक क्षेत्राला जगात एक वेगळी ओळख निर्माण करून देणारे ज्‍येष्‍ठ उद्योगपती रतन टाटा यांचे बुधवारी रात्री उशीरा निधन झाले. त्यांनी वयाच्या 86व्या वर्षी अखेरचा श्वास घेतला.

मुंबईतील एनसीपीए लॉन्समध्ये आज त्यांचे पार्थिव अंतिम दर्शनसाठी ठेवण्यात आले होते. यानंतर त्यांच्या पार्थिवावर वरळीतील स्मशानभूमीत शासकीय इतमामात अंत्यसंस्कार करण्यात आले. यावेळी मोठ्या जनसागरच्‍या उपस्थितीत त्‍यांना भावपूर्ण निरोप देण्‍यात आला.

#WATCH | Last rites of veteran industrialist Ratan Tata, being performed with state honour at Worli crematorium in Mumbai pic.twitter.com/08G7gnahyS

— ANI (@ANI) October 10, 2024

रतन टाटा यांचे मुंबईतील ब्रीच कॅंडी रुग्णालयात बुधवारी रात्री उशीरा निधन झाले. यानंतर त्यांचे पार्थिव ब्रीच कँडी रुग्णालयातून त्यांच्या कुलाबा येथील निवासस्थानी नेण्यात आले. तिथे त्यांच्या कुटुंबिय, नातेवाईक आणि विविध क्षेत्रातील दिग्गजांनी अंत्यदर्शन घेतले.

यानंतर सकाळी 10 ते दुपारी 4 या वेळेत नरिमन पॉइंट येथील एनसीपीए लॉन्स येथे अत्यंदर्शनासाठी ठेवण्यात आले होते. याप्रसंगी केंद्रीय गृहमंत्री अमित शहा, माजी केंद्रीय मंत्री शरद पवार, मुख्यमंत्री एकनाथ शिंदे, उपमुख्यमंत्री देवेंद्र फडणवीस, उपमुख्यमंत्री अजित पवार, ठाकरे गटाचे प्रमुख उद्धव ठाकरे, आंध्र प्रदेशचे मुख्यमंत्री चंद्राबाबू नायडू, मनसे अध्यक्ष राज ठाकरे यांच्यासह अनेक नेत्यांनी त्यांच्या पार्थिवाचे दर्शन घेतले.

#WATCH मुंबई, महाराष्ट्र: केंद्रीय गृह मंत्री अमित शाह, महाराष्ट्र के मुख्यमंत्री एकनाथ शिंदे, गुजरात के सीएम भूपेन्द्र पटेल और उपमुख्यमंत्री देवेंद्र फडणवीस ने दिग्गज उद्योगपति रतन टाटा को वर्ली श्मशान घाट पर श्रद्धांजलि दी। pic.twitter.com/kZZUXxlvY2

— ANI_HindiNews (@AHindinews) October 10, 2024

दुपारी 4 च्या सुमारास एनसीपीए लॉन्स ते वरळी स्मशानभूमी अशी त्यांची अंत्ययात्रा काढण्यात आली. रतन टाटा यांच्या अंत्यविधीवेळी वरळी स्मशानभूमी बाहेर सर्वसामान्य नागरिकांची देखील मोठी गर्दी जमली होती. व्हीआयपी निघाल्यावर सर्वसामान्यांना स्मशानभूमीत प्रवेश करण्यासाठी परवानगी देण्यात आली.

यानंतर स्मशानभूमीत पोलिसांकडून रतन टाटा यांच्या पार्थिवाला शासकीय इतमामात मानवंदना देण्यात आली. यावेळी पोलिसांनी 21 राऊंड फायर केले. यानंतर रतन टाटा यांच्यावर वरळी स्मशानभूमीतील विद्युतवाहिनीत अंत्यसंस्कार करण्यात आले.