Ramesh Kharmale : सह्याद्रीचं सौंदर्य पंतप्रधानांना भावलं.! जुन्नरच्या रमेश खरमाळे यांचं ‘मन की बात’मध्ये खास कौतुक

Narendra Modi | Ramesh Kharmale : देशाचे पंतप्रधान नरेंद्र मोदी हे दर महिन्याच्या शेवटच्या रविवारी आकाशवाणी वर ‘मन की बात’ मधून देशाशी निगडीत एका विषयावर देशवासियांशी संवाद साधतात. या महिन्यात जागतिक पर्यावरम दिन (दि. 5 जून) झाल्याने हा विषय त्यांनी ‘मन की बात’च्या 123 व्या भागात निवडला.

त्यात त्यांनी जुन्नरचे सुपूत्र वनरक्षक सेवानिवृत्त मेजर ‘रमेश खरमाळे’ कुटुंबासह करीत असलेल्या पर्यावरण रक्षण व संवर्धनाच्या कार्याचा गौरवाने उल्लेख केला. त्यामुळे जुन्नरसह पुणे जिल्हाच नाही, तर महाराष्ट्राची आज देशभर चर्चा झाली. सध्या सोशल मीडियावर देखील ‘रमेश खरमाळे’ यांची चर्चा होताना दिसत आहे.

In the 123rd Episode of Mann Ki Baat, Prime Minister Narendra Modi says, “Pune’s Ramesh Kharmale used to go to Junnar’s hills with his family, clear bushes, dig trenches to conserve water and sow seeds. In just two months, he made 70 trenches, numerous ponds… He is also… pic.twitter.com/mCbBqQHWW6

— ANI (@ANI) June 29, 2025

मन की बातच्या १२३ व्या भागात पंतप्रधान नरेंद्र मोदी म्हणाले, “पुण्याचे रमेश खरमाळे आपल्या कुटुंबासह जुन्नरच्या टेकड्यांवर जायचे, झुडपे साफ करायचे, पाणी वाचवण्यासाठी खंदक खोदायचे आणि बियाणे पेरायचे. फक्त दोन महिन्यांत त्यांनी ७० खंदके, असंख्य तलाव बनवले… ते एक ऑक्सिजन पार्क देखील तयार करत आहेत आणि परिणामी, पक्षी परत येत आहेत, वन्यजीवन पुनरुज्जीवित होत आहे…” ते  ४९ वर्षांचे माजी सैनिक आहे आणि वनरक्षक बनले आहे. त्यांनी आपल्या कुटुंबासह पुणे जिल्ह्यातील जुन्नर येथील एका टेकडीचे पुनरुज्जीवन केले.

जुन्नर तालुक्यातील खोडद गावातील खरमाळे हे भारतीय सैन्यात सेवा बजावत होते आणि २०१२ मध्ये निवृत्त झाले. निवृत्तीनंतर त्यांनी दोन वर्षे बँकेत काम केले, परंतु त्यांना त्या नोकरीत समाधान मिळाले नाही. नंतर त्यांनी जुन्नरमध्ये एक अकादमी सुरू केली, ज्याद्वारे अनेक तरुणांना सैन्यात यशस्वीरित्या भरती करण्यात आले. तथापि, तिथेही त्यांना खरोखर समाधान वाटले नाही. अखेर त्यांनी वन विभागाची परीक्षा दिली आणि वनरक्षक म्हणून काम करण्यास सुरुवात केली, जिथे त्यांना अखेर त्यांचे काम सापडले.

जुन्नर शहराजवळील वडज या गावात, रमेश खरमाळे यांनी सक्रिय लोकसहभागातून एक ‘ऑक्सिजन पार्क’ तयार केला आहे. या ठिकाणी विविध प्रकारची झाडे लावण्यात आली आहेत आणि येत्या काळात, ही झाडे वाढू लागताच, हा परिसर जैवविविधतेचे एक समृद्ध केंद्र बनण्याची अपेक्षा आहे.

मन की बात कार्यक्रमानंतर, खरमाळे यांनी फेसबुकवर पंतप्रधान मोदींचे आभार मानले आणि म्हटले की, त्यांचा उल्लेख आणि कौतुक त्यांना त्यांचे काम सुरू ठेवण्यासाठी ऊर्जा देईल. तसेच, राज्याचे मुख्यमंत्री देवेंद्र फडणवीस यांचे देखील आभार मानले आहेत.

खरमाळे पावसाचे पाणी साठविण्यासाठी डोंगरकड्यांवर खंदक खोदण्यात वेळ घालवतात. त्यांची पत्नी स्वाती शिवाजी महाराजांच्या काळातील जुन्या पायऱ्यांच्या विहिरींमधील अवांछित तण काढून टाकण्यास मदत करतात. त्यांची मुले, मयुरेश आणि वैष्णवी, नवीन खोदलेल्या खड्ड्यांमध्ये बिया टाकून सामील होतात. एकत्रितपणे, कुटुंब हवामान बदलाशी लढण्यासाठी त्यांची भूमिका बजावत आहे.

सह्याद्रीचं अनोखं रूप सोशल मीडियाच्या माध्यमातून लोकांसमोर आलं !

त्यांच्या जलसंवर्धन, वृक्षारोपण, पर्यावरण रक्षण, समाजसेवा या कार्याचा गौरव आत्तापर्यंत अनेकदा झाला आहे. त्यांना अनेक संस्था, महाराष्ट्र शासन, वन विभागाने पुरस्कार देऊन सन्मानित केले आहे. रमेश खरमाळे मागच्या अनेक वर्षांपासून सह्याद्रीचं अनोखं रूप सोशल मीडियाच्या माध्यमातून लोकांसमोर आणण्याचा निःस्वार्थपणे प्रयत्न करतायेत.

दैनिक ‘प्रभात’शी केलेली खास बातचीत…

“खरं तर जेव्हा मला हे समजलं आणि सांगण्यात आलं की तुमची (कामाची) दखल घेण्यात आली आहे. पंतप्रधान नरेंद्र मोदींकडून ‘मन कि बात’मध्ये तुमचा उल्लेख करण्यात येत आहे. हे ऐकून मला आश्चर्यचा धक्का बसला होता. एवढ्या छोट्या कामाची दखल एवढे मोठे लोक घेतात हे खूपच आश्चर्यकारक आहे. तेव्हा मला विश्वास बसला नाही.

पण रात्री मला मुंबई आकाशवाणी येथून फोन आला, आणि सांगण्यात आलं की, पंतप्रधान मोदींनी तुमच्या कामाची दखल घेतली आहे. तेव्हा मला आश्चर्याचा धक्का बसला… एवढ्या तळागातील व्यक्तींच्या कामाची दखल पंतप्रधान घेतात, हे आश्चर्यच होतं.

कारण येथून पुढे तळागाळात काही लोक लहान-मोठे कामे करतात याची सुद्धा दखल घेतली जाऊ शकते. या उत्साहाने अनेक लोकं भविष्यात काम करू शकतात. त्यामुळे पर्यावरण सेवा फार मोठी घडू शकते. असं रमेश खरमाळे यांनी सांगितलं.

ते पुढे म्हणाले की, मला आणि माझ्या कुटुंबाला खूप आनंद झाला आहे. गेली कित्येक वर्ष झाले आम्ही काम करतोय याची आज दखल घेतली आहे. पर्यावरण संवर्धन होणे खूपच गरजेचे आहे. कारण पर्यावरण श्वास आहे आपला. पर्यावरण हा महत्वाचा विषय आहे.

त्यामुळे पैशाच्या मागे न लागता पर्यावरणाच्या मागे लागावं. तापमानातील वाढ रोखण्यासाठी प्रत्येकाने प्रयत्न करावे. म्हणून स्वतः पासून सुरुवात केली तर अनेक हात काम करण्यास सुरुवात करतील. तेव्हाच आपला भारत देश हा पर्यावरणात पूर्ण समृद्ध होईल”, असं त्यांनी यावेळी सांगितलं.