अहमदनगर : कर्जत-जामखेडच्या राजकीय रणभूमीवर विधान परिषदेचे सभापती प्रा. राम शिंदे यांनी राष्ट्रवादी काँग्रेस (शरदचंद्र पवार) पक्षाचे आमदार रोहित पवार यांना सातत्याने धक्के देण्याचा सपाटा लावला आहे. यावेळी त्यांनी जामखेड कृषी उत्पन्न बाजार समितीवर लक्ष केंद्रित करत पवारांचे समर्थक आणि बाजार समितीचे उपसभापती कैलास वराट यांच्याविरुद्ध अविश्वास प्रस्ताव दाखल करून सहावा धक्का दिला आहे. जिल्हाधिकाऱ्यांकडे दाखल झालेल्या अविश्वास प्रस्तावात बाजार समितीचे सभापती शरद कार्ले यांच्यासह १२ सदस्यांनी कैलास वराट यांच्यावर गंभीर आरोप केले आहेत. यामध्ये वराट यांनी कायद्याचे उल्लंघन केल्याचा दावा करण्यात आला आहे. त्यांच्यावर मनमानी कारभार, बाजार समितीच्या उपविधीप्रमाणे कामकाज न करणे, शेतकऱ्यांच्या सुविधांकडे दुर्लक्ष करणे आणि समितीच्या आर्थिक उन्नतीसाठी कोणतीही उपाययोजना न करणे असे आरोप आहेत. विशेषतः, सरकारने ठरवलेल्या किमान आधारभूत किमतीपेक्षा कमी दराने खरेदी-विक्री होऊ नये यासाठी कोणतेही प्रयत्न न केल्याचा ठपका ठेवण्यात आला आहे. या प्रस्तावात शरद कार्ले, सचिन घुमरे, नंदकुमार गोरे, अंकुश ढवळे, विष्णू भोंडवे, गौतम उतेकर, गणेश जगताप, वैजिनाथ पाटील, राहुल बेदमुथ्था, रवींद्र हलगुंडे, सीताराम ससाणे आणि नारायण जायभाय यांनी सहभाग घेतला आहे. त्यांनी वराट यांनी सदस्यांचा विश्वास गमावल्याचे सांगत त्यांना उपसभापतीपदावरून हटवण्यासाठी विशेष सभा बोलावण्याची मागणी केली आहे. कायदेशीर प्रक्रिया काय? महाराष्ट्र कृषी उत्पन्न खरेदी-विक्री (विकास व विनियमन) अधिनियम १९६३ नुसार, जिल्हाधिकाऱ्यांना अविश्वास प्रस्ताव प्राप्त झाल्यापासून १५ दिवसांच्या आत विशेष सभा आयोजित करून सदस्यांच्या मतदानाद्वारे निर्णय घ्यावा लागेल. यामुळे जामखेड बाजार समितीतील राजकीय घडामोडींना आणखी वेग येण्याची शक्यता आहे. शिंदेंचा राजकीय ‘टायमिंग’ गाजतोय! राम शिंदे यांनी कर्जत-जामखेड मतदारसंघात रोहित पवार यांना सातत्याने शह देत राजकीय पटलावर आपला दबदबा निर्माण केला आहे. कर्जत नगरपंचायतीत सत्तांतर घडवून आणल्यानंतर त्यांनी जामखेड बाजार समितीतही आपला प्रभाव दाखवला आहे. यापूर्वी कर्जत कृषी उत्पन्न बाजार समिती, नगरपालिका, खरेदी-विक्री संघ आणि कर्जत दूध संघात पवारांना धक्के देत शिंदे यांनी आपली रणनीती यशस्वीपणे राबवली आहे. विशेष म्हणजे, पुण्यश्लोक अहिल्यादेवी होळकर यांच्या जन्मगावी चौंडी (ता. जामखेड) येथे झालेल्या मंत्रिमंडळ बैठकीनंतर आणि आता पावसाळी अधिवेशनाच्या काळात शिंदे यांनी हा अविश्वास प्रस्ताव आणून पुन्हा एकदा आपल्या राजकीय टायमिंगची चर्चा रंगवली आहे. या घडामोडींमुळे कर्जत-जामखेडच्या राजकारणात शिंदे यांचा वेग आणि रणनीती याची जोरदार चर्चा सुरू आहे. रोहित पवार यांच्यासाठी मोठा धक्का जामखेड बाजार समितीतील हा अविश्वास प्रस्ताव रोहित पवार यांच्यासाठी मोठा धक्का मानला जात आहे. शिंदे यांच्या या चालीमुळे पवार यांना आपली राजकीय ताकद टिकवण्यासाठी नव्या रणनीती आखाव्या लागणार आहेत. आगामी विशेष सभेत काय निर्णय होतो आणि त्याचा परिणाम स्थानिक राजकारणावर कसा होतो, याकडे सर्वांचे लक्ष लागले आहे.
