Rajnath Singh : इंटरनेट आणि चॅटजीपीटीच्या मदतीने आजारांचे स्वतःच निदान करण्याची वाढती प्रवृत्ती डॉक्टरांसमोर नवे आव्हान निर्माण करत असल्याचे संरक्षण मंत्री राजनाथ सिंह (Rajnath Singh) यांनी शनिवारी सांगितले. आरोग्याविषयी वाढलेली जागरूकता सकारात्मक असली तरी ऑनलाइन माहितीच्या आधारे रुग्ण स्वतःचे निदान करून डॉक्टरांकडे येत असल्याचे त्यांनी नमूद केले.

एका उद्घाटनप्रसंगी बोलताना सिंह (Rajnath Singh) यांनी छातीत सौम्य वेदना असलेल्या व्यक्तीचे उदाहरण दिले. इंटरनेटवर शोध घेतल्यानंतर ती व्यक्ती गंभीर हृदयविकार असल्याचा निष्कर्ष काढू शकते, प्रत्यक्षात अशा वेदनेमागे चिंता किंवा स्नायूंची समस्या असू शकते, असे ते म्हणाले.

ग्रामीण भागातील रुग्णांकडून लक्षणांचे वर्णन करताना वापरल्या जाणाऱ्या बोलीभाषेतील शब्दांचा उल्लेख करत त्यांनी ‘धुक-धुक’चे उदाहरण दिले. अशा वर्णनांचा अर्थ समजून घेण्यासाठी डॉक्टरांना रुग्णाशी संवाद साधणे महत्त्वाचे असल्याचे त्यांनी सांगितले.

तंत्रज्ञान आणि वैद्यकीय कौशल्य यांनी एकत्र काम करणे आवश्यक असल्याचे सिंह यांनी स्पष्ट केले. आधुनिक यंत्रे शरीरातील समस्या शोधण्यात मदत करतात; मात्र रुग्णाच्या मनातील भीती, चिंता आणि आशा समजून घेण्याची भूमिका डॉक्टरांचीच असल्याचे त्यांनी म्हटले.

एआय आणि डिजिटल निदानाचा वापर वाढत असताना रुग्णांची माहिती व गोपनीयता जपणे, पारदर्शकता राखणे, पूर्वग्रह टाळणे आणि रुग्णांच्या सुरक्षिततेला प्राधान्य देणे आवश्यक असल्याचेही सिंह (Rajnath Singh) यांनी अधोरेखित केले.