प्रभात वृत्तसेवा
राजगुरुनगर – शालेय विद्यार्थ्यांच्या बुद्धीला चालना देऊन त्यांचे जीवन सफल करण्यासाठी या बालसाहित्य संचाचा निश्चितच उपयोग होईल, असा विश्वास खेड-आळंदी विधानसभेचे आमदार बाबाजी काळे यांनी व्यक्त केला.राजगुरुनगर येथील सार्वजनिक वाचनालयात डॉ. ए. पी. जे. अब्दुल कलाम यांच्या जयंतीनिमित्त अभिवादन कार्यक्रम, वाचनालयाने खरेदी केलेल्या नव्या पुस्तक प्रदर्शनाचे उद्घाटन आणि खेड तालुक्यातील जिल्हा परिषदेच्या चार शाळांना बालसाहित्य संचांचे वाटप या कार्यक्रमाचे आयोजन करण्यात आले होते.

या कार्यक्रमात प्रमुख पाहुणे म्हणून आमदार काळे उपस्थित होते. त्यांनी विद्यार्थ्यांना अभ्यासक्रमाबाहेरील ज्ञान पुस्तकांच्या वाचनातून आत्मसात करून वाचनाची सवय शालेय जीवनापासूनच लावावी, असे आवाहन केले. तसेच हा पुस्तक संच विद्यार्थ्यांच्या सर्वांगीण विकासासाठी मार्गदर्शक ठरेल, असा विश्वासही त्यांनी व्यक्त केला.ग्रामीण भागातील जनतेसाठी हे वाचनालय वाचन संस्कार रुजविण्याचे प्रेरणादायी कार्य करत असल्याचे आमदार काळे यांनी नमूद केले. तसेच वाचनालयाच्या भावी योजनांसाठी आपला पाठिंबा कायम राहील, असेही त्यांनी सांगितले.

या प्रसंगी वाचनालयाचे अध्यक्ष प्रमोद गानू आणि मानद सचिव राजेंद्र सुतार यांनी मनोगत व्यक्त केले. यावेळी सदाशिव आमराळे, राजेंद्र सांडभोर, पवन कासवा, अशोक डोंगरे, सुधाकर मिडगे, दत्तात्रय सातपुते, कैलास दुधाळे, संतोष मांडेकर, डॉ. हेमंत सातारकर, डॉ. अविनाश फाटक, वासंती बेलसरे, कल्पना गवळी, अरुणा चव्हाण, कल्याणी वालझाडे, श्रद्धा काळे, मधुकर गिलबिले, संजय घुमटकर, विजयलक्ष्मी होले व वाचनप्रेमी मोठ्या संख्येने उपस्थित होते.