Rajgad Fort : मोठा आवाज अन् किंकाळ्या… राजगड पाहण्यासाठी गेलेल्या पर्यटकांवर काळाचा घाला; खोल दरीत बस कोसळली
Rajgad Fort : गाडीमध्ये एकूण २० प्रवासी होते
Rajgad Fort : ऐतिहासिक राजगड किल्ला पाहण्यासाठी मुंबईहून निघालेल्या पर्यटकांची खाजगी ट्रॅव्हल्स बस पाबे घाटातील खोल दरीत कोसळली. या भीषण अपघातात दोन पर्यटकांचा जागीच मृत्यू झाला आहे. तर, अनेक जण गंभीर जखमी झाले आहेत. चालकाचे गाडीवरील नियंत्रण सुटल्याने हा अपघात घडल्याची प्राथमिक माहिती समोर आली आहे.
मिळालेल्या माहितीनुसार, मुंबईतील अंधेरी परिसरात राहणारे २० जण वीकेंडला ट्रेकिंग आणि पर्यटनाचा आनंद घेण्यासाठी खाजगी ट्रॅव्हल्सने राजगड किल्ल्याकडे निघाले होते.
रविवारी सकाळच्या सुमारास त्यांची बस वेल्हा आणि खानापूर दरम्यान असलेल्या दुर्गम पाबे घाटात आली असता, एका धोकादायक वळणावर चालकाचे नियंत्रण सुटले. नियंत्रण सुटलेली ही ट्रॅव्हल्स थेट रस्त्यावरून खाली सुमारे २० ते २५ फूट खोल दरीत कोसळली.
Siya Chetan Video : मॅच पाहताना सिया आणि चेतनचा जुना VIDEO व्हायरल; ‘त्या’ कृतीने वेधलं लक्ष!
दोन जणांचा जागीच मृत्यू
ट्रॅव्हल्स दरीत कोसळताच घाटात प्रवाशांच्या किंकाळ्यांनी एकच खळबळ उडाली. गाडीमध्ये एकूण २० प्रवासी होते. अपघात इतका भीषण होता की, यातील दोन जणांचा जागीच मृत्यू झाला. तर इतर अनेक प्रवासी गाडीतच अडकून पडले आणि गंभीर जखमी झाले. अपघाताची माहिती मिळताच स्थानिक नागरिक, पोलिस आणि बचाव पथकाच्या मदतीने त्यांना सुरक्षित बाहेर काढण्यात आले. जखमींना तातडीने जवळच्या रुग्णालयात उपचारासाठी दाखल करण्यात आले.
या अपघातात एका तरुणाचा आणि एका तरुणीचा जागीच मृत्यू झाल्याचे सांगण्यात येत आहे. तर चालकासह काही जण गंभीर जखमी असल्याने मृतांचा आकडा वाढण्याची शक्यता व्यक्त केली जात आहे. पोलिसांनी घटनास्थळी पंचनामा करून अपघाताची नोंद केली असून नेमके कारण शोधण्यासाठी तपास सुरू केला आहे.
हेही वाचा:
