Rahul Gandhi FIR : राम मंदिरातील दानाच्या कथित गैरव्यवहाराच्या मुद्द्यावर संसद परिसरात झालेल्या विरोध प्रदर्शनानंतर काँग्रेस नेते राहुल गांधी, खासदार पप्पू यादव आणि समाजवादी पक्षाचे खासदार अवधेश प्रसाद यांच्याविरोधात वाराणसीमध्ये गुन्हा (FIR) दाखल करण्यात आला आहे.

संत समाजाने दिलेल्या तक्रारीच्या आधारे ही कारवाई करण्यात आली असून, पोलिसांनी प्रकरणाचा तपास सुरू केला आहे.

काशी विभागाचे पोलीस उपायुक्त (DCP) गौरव बंसवाल यांनी सांगितले की, प्राप्त तक्रारीच्या आधारे गुन्हा नोंदविण्याची प्रक्रिया सुरू करण्यात आली आहे. प्राथमिक तपासानंतर पुढील कायदेशीर कारवाई केली जाईल.

संत समाजाचा आरोप काय?

तक्रारदार संत समाजाने आरोप केला आहे की, संसदेत राम मंदिरातील दानाच्या मुद्द्यावर ज्या पद्धतीने आंदोलन करण्यात आले, त्यामुळे सनातन धर्माच्या भावना दुखावल्या गेल्या. धार्मिक परंपरा आणि श्रद्धांचा अपमान झाल्याचा आरोप करत त्यांनी संबंधित खासदारांवर कारवाईची मागणी केली आहे.

सोशल मीडियावरील व्हिडिओंचाही उल्लेख –

डीसीपी गौरव बंसवाल यांनी सांगितले की, तक्रारीत सोशल मीडियावर व्हायरल झालेल्या काही व्हिडिओंचाही उल्लेख करण्यात आला आहे. या व्हिडिओंमध्ये खासदार पप्पू यादव साधूच्या वेशात दिसत असल्याचा दावा करण्यात आला असून, त्यांच्या कृतींमुळे सनातन धर्माचा अवमान झाल्याचा आरोप तक्रारदारांनी केला आहे. या सर्व बाबींची पोलिसांकडून तपासणी केली जात आहे.

संसदेत नेमके काय घडले?

शुक्रवारी संसदेच्या पावसाळी अधिवेशनादरम्यान इंडिया आघाडीच्या खासदारांनी अयोध्येतील राम मंदिरातील चढावे आणि दानाच्या वापरात कथित गैरव्यवहार झाल्याचा आरोप करत संसद परिसरात आंदोलन केले होते.

या आंदोलनादरम्यान विरोधी पक्षाच्या खासदारांनी केंद्रीय गृहमंत्री अमित शाह यांनी या प्रकरणावर संसदेत स्पष्टीकरण द्यावे, अशी मागणी केली. तसेच आंदोलन करणाऱ्या विद्यार्थ्यांवर झालेल्या पोलिस कारवाईबाबतही सरकारला उत्तर देण्याची मागणी करण्यात आली.

घोषणाबाजी आणि प्रतीकात्मक आंदोलन –

आंदोलनादरम्यान विरोधी पक्षाच्या खासदारांनी “चंदा चोर, गद्दी छोड़”, “जवाब देना होगा” आणि “अमित शाह, सदन में आओ” अशा घोषणा दिल्या.

यावेळी पूर्णियाचे खासदार पप्पू यादव भगव्या वेशात आंदोलनात सहभागी झाले होते. त्यांच्या हातात भगवान राम यांचे छायाचित्र होते. तसेच त्यांनी मंदिरातील पुजाऱ्याचा प्रतीकात्मक वेश धारण करून चढावा गोळा करण्याचे प्रात्यक्षिक केल्याने हा प्रकार वादाच्या केंद्रस्थानी आला आहे.

दरम्यान, या प्रकरणात पोलिसांकडून तक्रारीतील आरोप, व्हिडिओ आणि इतर पुराव्यांची तपासणी सुरू असून, तपासानंतर पुढील कायदेशीर निर्णय घेतला जाणार आहे.